नवा उत्साह, नवा आनंद घेऊन येणाऱ्या गुढीपाडव्याच्या सणावर यंदा करोनाचं सावट आहे. चित्रीकरण थांबल्यामुळे कलाकारांना सणासुदीला घरी राहता आलंय. अभिनेत्री श्रद्धा कपूरनं या निमित्तानं 'मुंटा'च्या वाचकांशी संवाद साधत त्यांना पाडव्याच्या शुभेच्छा दिल्या.
सर्व वाचकांना माझा नमस्कार आणि सर्वांना गुढीपाडव्याच्या हार्दिक शुभेच्छाही.
दरवर्षी सिनेमाचं चित्रीकरण, प्रमोशन किंवा काही ना काही कामाच्या निमित्तानं गुढीपाडव्याच्या दिवशी मी घराबाहेर असते. गेल्या अनेक वर्षांमध्ये पाडव्याच्या सणाला मी पूर्ण दिवस घरी आहे असं कधी होत नव्हतं. माझ्यासारखीच अनेक मंडळी या सणाच्या दिवशी कामानिमित्त घराच्या बाहेर असतात. पण, यंदा बहुतेक जण आपापल्या घरी आहोत. जगभरातील परिस्थिती बिघडली आहे. महाराष्ट्रात आज जी कठीण परिस्थिती आली आहे, तिला आपल्याला धीरानं तोंड द्यायचं आहे. आज आपण या विषाणूशी लढत आहोत. पण, लवकरच आपण त्याला नष्ट करून विजयाची गुढी उंचावू; अशी मला खात्री आहे. डॉक्टर, नर्सेस, वैद्यकीय कर्मचारी, पोलीस यंत्रणा गेले अनेक दिवस डोळ्यांत तेल घालून रात्रं-दिवस तत्परतेनं काम करत आहेत. आपणदेखील घरीच बसून त्यांना सहकार्य करणं खूप महत्वाचं आहे. आपण यंदा सहकुटुंब एकत्र घरी आहोत, तर त्याकडे चांगली संधी म्हणून पाहा. आनंदानं पण, घरीच आपल्याला गुढीपाडवा साजरा करायचा आहे.
आज आमचं संपूर्ण कुटुंब एकत्र आहे. मनात एक प्रकारचं समाधान आहे की, कित्येक वर्षांनंतर सणाला आम्ही सर्व एकत्र घरी आहोत. रोज घाई-गडबडीत घरातल्या ज्या गोष्टींकडे माझं लक्ष जात नाही, त्या प्रत्येक बारीकसारीक गोष्टीकडे मी आज पाहतेय. वर्षभर केवळ एका बिंदूकडून दुसऱ्या बिंदूकडे आपण सगळेच धावत असतो. थोडं थांबून जराही आजुबाजूला पाहत नाही. आज मात्र ती वेळ आली आहे की, आपण आपल्या आजुबाजूला असलेल्या प्रत्येक गोष्टीचं निरीक्षण करायचं आहे. येत्या काही दिवसांमध्ये पुन्हा आपण आपल्या रोजच्या धावपळीत गुंतले जाऊ. पण, आज जो वेळ हातात आहे; तो पूर्ण वेळ आपण स्वतःला, आपल्या कुटुंबाला देणं आवश्यक आहे. दक्षता म्हणून आज आपण सर्व जण घरी आहोत. त्याकडे आपण सकारात्मक दृष्टीनं बघायला हवं. कारण, हीच सकारात्मकता आपल्याला उद्या उठून पुन्हा काम करण्याची ऊर्जा आणि प्रेरणा देणार आहे.
आज घरी गोडाधोडाचं जेवण बनणार आहे. मीदेखील स्वयंपाकघरात तिला थोडी-फार मदत करणार आहे. मला जिलेबी आणि शंकरपाळ्या खूप आवडतात. गेल्या दोन-तीन दिवसांपासून घरात सणानिमित्त साफसफाई झाली. मी देखील घरातल्या बारीकसारीक गोष्टींमध्ये हातभार लावत असते. या छोट्या-छोट्या गोष्टींमधील आनंद खूप सुखावणारा आहे. माझ्या दैनंदिन आयुष्यातल्या काही सवयीसुद्धा मी थोड्याशा बदलल्या आहेत. गेल्या आठ महिन्यांपासून मी शाकाहारी झाले आहे. माझं पुस्तक वाचन सुरू आहे. आणखी एक गोष्ट म्हणजे, शॉवर बाथ घेणं मी सोडून दिलं आहे. त्याऐवजी बादलीत पाणी घेऊन माझी आंघोळ होते. पाणी वाचवण्याच्या दृष्टीनं हे एक छोटंसं पाऊल. तुम्हीसुद्धा हे केलंत तर खूप पाणी वाचू शकेल, असं मला वाटतं.
बऱ्याच दिवसानंतर असं छान मनमोकळं व्यक्त होता आलं, त्याचा आनंद आहे. पुन्हा एकदा सर्वांना गुढीपाडव्याच्या खूप सार"या शुभेच्छा. सर्वांनी आनंदी राहा आणि घरीच सुरक्षित राहा.
शब्दांकन - कल्पेशराज कुबल
फोटो - साहील बेहल