Kapil Sharma: कपिलला एकटं राहू द्या: किकू

सहकाऱ्यांशी वाद, ट्विटद्वारे शिवीगाळ, त्यावरून झालेली टीका अशा अनेक प्रकरणांवरून गेल्या काही महिन्यांपासून वादात सापडलेल्या कॉमेडियन कपिल शर्माला त्याची एकेकाळची सहकारी भारती सिंहनं पाठिंबा दिल्यानंतर आता कॉमेडियन किकू शारदानंही त्याच्याबद्दल सहानुभूती व्यक्त केली आहे. कपिल शर्मा ज्या मानसिक परिस्थितीतून जात आहे, ते बघता त्याला एकटंच राहू द्या, असं आवाहन त्यानं केलं आहे.

कपिल शर्मा हा आमच्या इंडस्ट्रीतील सर्जनशील व्यक्तींपैकीच एक आहे. मात्र, त्याला सध्या नैराश्यानं ग्रासलं आहे. त्याची मानसिक परिस्थिती ठीक नाही. अशा परिस्थितीत आपण त्याला साथ द्यायला हवी. त्यामुळं त्याला काही वेळ एकटं राहू द्या, असं किकू म्हणाला.

सध्या जे काही घडलं ते खूपच दुर्दैवी आहे. कपिल शर्मानं कॉमेडीनं देशवासियांचं मनोरंजन केलं आहे. त्यांच्या चेहऱ्यावर हसू फुलवलं आहे. जगाला हसवणाऱ्या कपिलला आता थोडी मोकळीक हवी आहे, असंही तो म्हणाला. गेल्या काही काळात घडलेल्या घटनांवरून त्याच्याबद्दल काही नकारात्मक गोष्टी पसरवण्यात आल्या. त्या सगळ्या खोट्या आहेत. त्यानं मुद्दामहून कोणतंही चित्रीकरण रद्द केलेलं नाही, असंही त्यानं स्पष्ट केलं. नकारात्मक लिखाण करून त्याला लक्ष्य केलं जात आहे. कपिलच्या वागण्याचं समर्थन करत नाही. मात्र, सध्या त्याला नैराश्येनं ग्रासलं आहे. त्यात त्याच्याबद्दल नकारात्मक गोष्टी पसरवून खच्चीकरण करण्याचा प्रयत्न केला जात आहे, असंही तो म्हणाला.