'अभिनेता' नागराज मंजुळेंच्या 'द सायलेन्स'चा ट्रेलर पाहिला?

मटा ऑनलाइन वृत्त । मुंबई

फँड्री, सैराट या सामाजिक चित्रपटांचे संवेदनशील दिग्दर्शक नागराज मंजुळे पुन्हा प्रेक्षकांच्या भेटीला येत आहेत. विशेष म्हणजे, यावेळी ते कॅमेऱ्याच्या मागे नसून मध्यवर्ती भूमिका साकारताना दिसतील. सत्य घटनेवर आधारित 'द सायलेन्स' या चित्रपटातून नागराजअण्णांचं दर्शन घडणार आहे. याआधी फँड्री आणि सैराटमधून ते छोटेखानी भूमिकांमधून दिसले होते.

मुंबईच्या लोकल ट्रेनमध्ये एक असा प्रसंग घडतो जो चिमुरड्या चिनीला भूतकाळात घेऊन जातो. गरीब घरातली चिनी आपल्या वडिलांसोबत राहत असते. पण, गरिबीमुळे तिचा सांभाळ करणं त्यांना कठीण होतं आणि ते तिला काकांकडे शहरात पाठवतात. त्यानंतर तिचं आयुष्य कसं बदलतं, कोणत्या घटनेचे तिच्या मनावर काय परिणाम होतात, ही 'द सायलेन्स' चित्रपटाची कथा आहे. समाजातील विविध पैलूंवर, अपप्रवृत्तींवर हा सिनेमा भाष्य करतो. अॅड. पूजा कुटे यांच्याकडे आलेल्या एका खटल्यावर सिनेमाची कथा बेतली आहे. मराठी सिनेसृष्टीला वेगळ्या धाटणीचे अनेक सिनेमे देणाऱ्या गजेंद्र अहिरे यांनी या चित्रपटाचं दिग्दर्शन केलंय. आत्तापर्यंत ३५ हून अधिक चित्रपट महोत्सवांमध्ये या सिनेमानं समीक्षकांची वाहवा मिळवलीय आणि १५ पुरस्कारांवरही मोहोर उमटवलीय.

येत्या ६ ऑक्टोबरला 'द सायलेन्स' प्रदर्शित होतोय. नुकताच या चित्रपटाचा ट्रेलर प्रदर्शित झाला. तो चटका लावून जातो, उत्कंठा वाढवतो.