मुंबई टाइम्स टीम
हैदराबादमध्ये एका महिला डॉक्टरवर पाशवी बलात्कार करून तिला जिवंत जाळण्यात आल्याच्या घटनेमुळे देश सुन्न झाला. देशभरातून यावर तीव्र प्रतिक्रिया उमटत आहेत. सोशल मीडियावर संतप्त प्रतिक्रियांचा पूर आला आहे. मराठी कलाकारांनीही या घृणास्पद घटनेवरुन संतापाला वाट मोकळी करून दिली. Priyankareddy यांनी पशुवैद्यकीय शाखेची पदवी घेतली होती. त्यांना ठाऊकच नव्हतं, की सगळ्यात भयानक पशू म्हणजे माणूसच आपल्याला असं संपवेल! या नीच आणि क्रूर पशूंना लवकरात लवकर भरचौकात जिवंत जाळलं पाहिजे. अत्यंत अविश्वासनीय...वेदनादायी!
हेमंत ढोमे, अभिनेता
डॉ. प्रियांका यांना भावपूर्ण श्रद्धांजली. जो देश स्त्रियांचा सन्मान ठेवू शकत नाही तो आपलं सत्त्व गमावतो.
#enoughisenough
- सुबोध भावे, अभिनेता
कठोरातली कठोर शिक्षा ठोठावण्याची वेळ आता आली आहे. अगदी असहाय्य, हरवल्यासारखं वाटतंय.
#priyankareddy #enoughalready
-सई ताम्हणकर, अभिनेत्री
बलात्काराचे खटले फास्ट ट्रॅकवर घेऊन या. अशा जनावरांना ताबडतोब कठोरातली कठोर शिक्षा व्हावी, यासाठी एखादा कायदा किंवा तरतूद नाही का करता येणार? करायलाच हवं! लहान घटना असो किंवा ही अशी क्रूर असो, दरवेळेस हे असं वाचलं की मला पुरुष असल्याची लाज वाटते...वाटत राहते. शिक्षेच्या पलीकडे ही मनोवृत्ती नाहीशी व्हावी यासाठीही काही उपाययोजना करायला हव्यात. काय आणि कसं मला माहीत नाही, पण काहीतरी करायलाच हवं!
- समीर विद्वांस, लेखक
घडलेल्या घटनेबद्दलच्या वेदनादायी प्रतिक्रिया मांडण्यासाठी शब्दच नाहीत. आपण सुरक्षित नाही, ही भीती दिवासागणिक वाढत आहे. हे सगळं कुठेतरी थांबलं पाहिजे. काय करायला हवं, हे माहीत नाही. आपण कधीतरी सुरक्षित होऊ अशी आशा आहे.
- प्रिया बापट, अभिनेत्री
गेल्या महिन्यात मी हरियाणा ते दिल्ली असा रात्री साडेनऊच्या सुमारास प्रवास करत होते. हृदयात धडधड सुरू होती. मनात निर्भयाचे विचार घोळत होते. मोबाइलमध्ये गुगल मॅप सुरू होता, नवरा माझ्या संपर्कात होता. विमानतळावर सुरक्षितपणे पोहोचण्यासाठी मनोमन प्रार्थना करत होते. टोल प्लाझाला गाडी थांबली तेव्हा गणवेशातील ९ पुरुषांचं माझ्याकडे लक्ष गेलं. त्यातला एक मला बघून गाणं गाऊ लागला. त्या क्षणात माझ्या हृदयाचे ठोके थांबले होते. चालकानं तिथून लवकरात लवकर गाडी काढावी, असं वाटत होतं. त्याप्रमाणे त्यानं काढलीही. पण मी वेळीच तिथून निघाले नसते तर...
#priyankareddy#nirbhaya#rape#fear#safety
- मनवा नाईक, अभिनेत्री-दिग्दर्शक
भयावह! डॉ. प्रियंका रेड्डी यांना भावपूर्ण श्रद्धांजली. हे सगळं कधी थांबेल? आपल्या देशातील महिला कधी सुरक्षित होतील?
-रेणुका शहाणे, अभिनेत्री
आपण पुन्हा अपयशी ठरलो. #JusticeForPriyanka
- स्वप्नील जोशी, अभिनेता
काय बोलावं यांच्याबद्दल? एवढे हपापलेले पुरुष! कधीच बाई न बघितल्यासारखे का वागतात? कधी-कधी आम्हा मुलींना इनबॉक्समध्ये अश्लील मेसेज येतात. कदाचित हीच सुरुवात असावी. मी त्याकडे दुर्लक्ष करते. पण यापुढे करणार नाही. या आजाराला मुळापासून नष्ट करण्यासाठी यापुढचे सगळे कमेंट्स पोस्ट केले जातील याची नोंद घ्यावी.
- अभिज्ञा भावे, अभिनेत्री