‘पेहरेदार...’ला वेळबदलाची सूचना

नवी दिल्ली : सोनी वाहिनीवरील ‘पेहरेदार पिया की’ ही वादग्रस्त मालिका लहान मुलांनी पाहू नये यासाठी तिच्या प्रसारणाची वेळ रात्री १० करण्याची सूचना दूरचित्रवाहिन्यांवर लक्ष ठेवणाऱ्या ‘ब्रॉडकास्टिंग कंटेण्ट कंप्लेण्ट्स कौन्सिल’ (बीसीसीसी) या नियामक संस्थेने केली आहे. तसेच ही मालिका बालविवाहाला प्रोत्साहन देत नाही, असे धावती पट्टी चालवण्याचे निर्देशही वाहिनीच्या प्रमुखांना देण्यात आले आहेत.

मालिकेच्या प्रतिगामी विषयामुळे तिच्यावर बंदी आणण्याच्या वाढत्या मागण्यांच्या पार्श्वभूमीवर ‘बीसीसीसी’चे नवे प्रमुख निवृत्त न्यायाधीश विक्रमजीत सिंग यांच्या अध्यक्षतेखाली बुधवारी झालेल्या बैठकीत मालिकेच्या वेळबदलाचा हा निर्णय घेण्यात आला. गेल्या महिन्यात सुरू झालेल्या ‘पेहरेदार पिया की’ मालिकेचे कथानक नऊ वर्षांचा मुलगा आणि १८ वर्षांच्या तरुणीच्या विवाहाभोवती भिरते. ही मालिका रात्री ८:३० वाजता प्रसारित केली जात आहे.