एकीकडे करोनाविषयी चिंतेचं वातावरण वाढत असतानाच बॉलिवूडमध्ये मात्र या नावाचा वापर करून घेण्यासाठी हालचाली सुरू झाल्या आहेत. अनेक निर्मात्यांनी 'करोना' हा शब्द घेऊन शीर्षकांची नोंदणी करून घ्यायला सुरुवात केली आहे.
मुंबई टाइम्स टीम
जगभरात करोनाचा प्रादुर्भाव वाढत चालला आहे. एकीकडे करोनाविषयी चिंतेचं वातावरण वाढत असतानाच बॉलिवूडमध्ये मात्र या नावाचा वापर करून घेण्यासाठी वेगानं हालचाली सुरू झाल्या आहेत. बॉलिवूडच्या सिनेनिर्मात्यांनी आपल्या आगामी चित्रपटाच्या शीर्षकांमध्ये 'करोना' या शब्दाचा वापर करुन ते शीर्षक नोंदवून घेण्यावर भर दिला आहे. 'करोना' हा शब्द सध्या सिनेनिर्मत्यांच्या पसंतीस उतरत आहे. सिनेमांच्या नावांसाठी या शब्दाला अधिक प्राधान्य दिलं जात असल्याचं दिसून येतंय.
सिनेमाची कथा ठरण्याअगोदरच सिनेमाचं शीर्षक आपल्या नावावर करून घेण्यासाठी निर्मात्यांमध्ये रस्सीखेच सुरू असते. त्यामुळेच प्रोडक्शन असोसिएशनच्या ऑफिसमध्ये सध्या सिनेनिर्मात्यांच्या फेऱ्या वाढल्या आहेत. आगामी सिनेमासाठी 'करोना' या शब्दाचा वापर करून तयार केलेलं नाव अनेकांना अगोदरच नोंदणी करून ठेवायचं आहे.
अभिनेता हृतिक रोशनचा सुपरहिट 'कहो ना प्यार है' या सिनेमाच्या नावाशी साधर्म्य ठेवत 'कोरोना प्यार है' या चित्रपटाचं शीर्षक इरॉस इंटरनॅशनलनं नोंदवलं आहे. आयएफटीसीपीच्या (इंडियन फिल्म अँड टेलिव्हिजन प्रोड्यूसर काउन्सिल) सूत्रांनी दिलेल्या माहितीनुसार, इरॉस इंटरनॅशनलनं गेल्या आठवड्यात 'कोरोना प्यार है' या चित्रपटाचं शीर्षक म्हणून नोंदणी केली. या माहितीला दुजोरा देत निर्माता कृषिका लुल्ला म्हणाल्या, की 'सध्या या सिनेमाच्या स्क्रिप्टिंगचं काम सुरू आहे. हा सिनेमा साथीच्या रोगांवर आणि प्रेमकथेवर आधारित असेल. सध्या आम्ही कथानकावर काम करीत आहोत.' त्याचप्रमाणे आयएमपीपीए अर्थात 'इंडियन मोशन पिक्चर प्रोड्यूसर असोसिएशन'कडे देखील करोनावर आधारित चित्रपटांच्या नावांची नोंदणी करण्यासाठी सिनेनिर्माते गर्दी करत आहेत. सध्या 'डेडली कोरोना' या नावाची नोंद असोसिएशनकडे झाली आहे. येत्या दिवसांमध्ये अशा प्रकारच्या सिनेमांच्या शीर्षकांसाठी अधिकाधिक अर्ज असोसिएशनकडे येण्याची शक्यता असल्याचं असोसिएशननं म्हटलं आहे.