असतील फॉलोअर्स, तर मिळतील वेबसीरिज

शब्दुली कुलकर्णी

गेल्या काही दिवसांपासून काही कलाकार सोशल मीडियावर खूप अॅक्टीव्ह झालेले दिसून येताहेत. यामागचं कारण आहे वेबसीरिज. आता हा नेमका काय प्रकार आहे, असा प्रश्न तुम्हाला पडला असेल. तर, कलाकारांच्या सोशल मीडियावरील लोकप्रियतेचा अंदाज घेऊन त्यांना वेबसीरिजमध्ये संधी दिली जातेय. त्यामुळेच कलाकारांची सोशल मीडियावरील उपस्थिती वाढली आहे. कुठे शूटिंग असल्यास सेटवरचे व्हिडीओ, सहकलाकारांसोबतचे फोटो पोस्ट करणं किंवा सकाळी एक तरी अशी पोस्ट करायची की ज्याची दिवसभर चर्चा झाली पाहिजे असा फंडा कलाकार आजमावू लागले आहेत.

लाखोंनी मिळणारे लाइक्स आणि हजारोंमध्ये मिळणारे कौतुकाचे कमेंट्स यामुळे एखादा कलाकार चर्चेत राहणं पसंत करतो. सोशल मीडियावर प्रसिद्ध असणाऱ्या कलाकारांची निवड वेबसीरिजसाठी होत असल्यानं, सोशल मीडियावरुन थेट वेबसीरिजमध्ये असं चित्र सध्या दिसून येतंय. कलाकाराच्या सोशल मीडियावरील प्रसिद्धीचा फायदा वेबसीरिजला होतो. त्यामुळे बहुतांशी वेबसीरिजचे निर्माते किंवा दिग्दर्शक सोशल मीडियावर हिट असलेल्या कलाकाराची निवड करू लागले आहेत.
प्रमोशनची अट

'सोशल मीडिया आणि वेबसीरिज ही दोन्ही माध्यमं परस्परांवर अवलंबून असतात. या दोन्ही माध्यमांचा एकमेकांना फायदा होतो. एखाद्या कलाकाराला सोशल मीडियावर जी काही प्रसिद्धी मिळते त्याचा फायदा वेबसीरिजलाही होतो. परिणामी, व्ह्यूज वाढतात. त्यामुळे सोशल मीडियावर प्रसिद्ध असलेल्या कलाकारांना वेबसीरिजमध्ये घेतलं जातं. डिजिटल व्यासपीठावरील प्रेक्षकांना नवा चेहरा हवा असतो. म्हणून वेबसीरिजसाठी कलाकार निवडताना सोशल मीडियावर प्रसिद्ध असलेला चेहरा निवडण्यास प्राधान्य दिलं जातं', असं प्रसिद्ध दिग्दर्शक विजू माने यांनी ‘मुंटा’शी बोलताना सांगितलं. तसंच, वेबसीरिज करताना त्या कलाकारानं वेबसीरिजचं प्रमोशन सोशल मीडियावर करावं असं करारामध्ये नमूद केलं जातं. करारात आणखीही काही अटी घातल्या जातात.
करारात आढळणाऱ्या प्रमुख अटी

० एखाद्या सीरिजचं दुसरं पर्व येणार असल्यास कलाकारांनी सहकार्य करावं.
० एपिसोड्सची संख्या सांगितली जाते.
० जेवढे दिवस शूट चालेल तेवढे दिवस ठराविक तास शूट करावं.
० सोशल मीडियावरुन वेबसीरिजचं सोशल मीडियावर प्रमोशन करणं.
० एका चॅनेलची वेबसीरिज करताना दुसऱ्या चॅनेलची सीरिज करण्यास मनाई.
० वेबसीरिज इतर भाषांमध्ये डब करुन दाखवू शकतो.

कलाकार म्हणतात...
जास्तीत जास्त लोकांपर्यंत पोहोचता येत असल्यामुळे कलाकार वेबसीरिजला प्राधान्य देत असतात. एखादी वेबसीरिज ही अनेक भाषांमध्ये डब करुन प्रसारित करता येत असल्यामुळे इतर भाषक प्रेक्षकांचे व्ह्यूजही त्याला मिळतात. यामुळे कलाकार मंडळी मोठ्या प्रमाणावर या माध्यामाकडे वळत असल्याचं काही कलाकारांनी ‘मुंटा’शी बोलताना सांगितलं. हे माध्यम नवं असल्यानं कलाकारांनाही याविषयी उत्सुकता आहे.