बारा नंबरी योगायोग

'मोरया', 'झेंडा' या चित्रपटातील भूमिकांमुळे अभिनेता संतोष जुवेकरने तरुणाईला वेड लावलं. आज त्याचा वाढदिवस असून त्या निमित्ताने काही अविस्मरणीय आठवणी त्याने 'मुंटा'शी शेअर केल्या आहेत.

वाढदिवस हा प्रत्येकासाठीच खास दिवस असतो. माझ्यादेखील लहानपणापासूनच्या अशा बऱ्याच आठवणी आहेत पण त्यातही २०१२ सालचा वाढदिवस माझ्या लक्षात आहे. कारण या वेळी मी स्वतःलाच वाढदिवसाची भेट दिली होती. तेव्ही मी एक अलिशान नवीन गाडी खरेदी केली होती. या मागचं विशेष प्रयोजन म्हणजे त्यावर्षी माझ्या वाढदिवासाची तारीख १२/१२/१२ अशी हटके होती आणि मी गाडीचा नंबर देखील १२ असणाराच घेतला होता. त्यामुळे हे १२ तारखेचं समीकरण व्यवस्थितरित्या जुळून आलं होतं तर मी एका वाढदिवसाला एकटाच कोकणात गेलो होतो. तिथं मी तीन-चार दिवस राहिलो तो अनुभवसुद्धा खूप सुखद होता. माझे चाहतेसुद्धा माझा वाढदिवस तितकाच हटके करतात. चॉकलेट्स, टी-शर्टस असे अनेक गिफ्ट्स मला मिळतात. एवढंच नाही तर ज्यांना माझ्या घरचा पत्ता माहीत आहे ते गिफ्ट मला कुरिअरने पाठवतात. अशा बऱ्याच आठवणी आहेत. तर सध्या मी एका चित्रपटाच्या शूटिंगमध्ये व्यस्त आहे, पण सेटवर देखील बरीच मज्जा, धमाल असते. त्यामुळे या वाढदिवसाची सुद्धा मला तितकीच उत्सुकता आहे.

शब्दांकन: सिद्धेश सावंत, डहाणूकर कॉलेज