माझे मन तुझे झाले!

प्रेम फक्त आवडत्या मुलावर किंवा मुलीवरच करतात असं कुठे आहे? आपलं पहिलं प्रेम कुणावरही असू शकतं. हीच गोष्ट आम्ही वेगवेगळ्या क्षेत्रातल्या काही नामवंत मंडळींना विचारली. काय आहे त्यांचं म्हणणं, वाचा…

आईवर निःस्सीम प्रेम
पहिलं प्रेम म्हणता क्षणी माझ्या डोळ्यांसमोर उभी राहते आईची शांत, निर्विकार मूर्ती. काही वर्षांपूर्वी आई आम्हाला सोडून गेली. खरं तर गाणं शिकवणारी, संगीताची ओळख करुन देणारी माझी पहिली गुरू ही माझी आईच. त्यामुळे माझ्या आयुष्यात तिचं स्थान पहिल्या क्रमांकावरच आहे. मग ते प्रेम असो की गुरू. आता ती नसली तरी संगीत साधनेतून मी तिला स्मरतो. माझा दिवसातला बराचसा वेळ रियाजात, म्हणजे तिच्यासाठीच जातो.
- महेश काळे, गायक

जास्मिनची जादू
लेखन हे पहिलं प्रेम असलं, तरी त्याची जागा आता माझ्या बायकोने, म्हणजेच जास्मिनने घेतली आहे. काही वर्षांपूर्वी माझा एक मोठा अपघात झाला होता. परत लिहू शकेन की नाही अशी परिस्थिती होती. पण या कठीण प्रसंगात तीच माझ्या पाठीशी ठामपणे उभी राहिली. अपघातानंतर पुन्हा नव्याने लेखन सुरू करण्याची प्रेरणा तिनेच मला दिली. त्यामुळे माझ्यासाठी पहिल्या आणि खऱ्या प्रेमाची व्याख्या ही जास्मिनच आहे.
- सुदीप नगरकर, लेखक

कुटुंब आधी
कुटुंबापासून ते माझ्या डिझायनिंगच्या आवडीपर्यंत अनेक गोष्टी माझ्या पहिल्या प्रेमाच्या यादीत येतात. ‘फॅमिली फर्स्ट’ असा मी माणूस आहे. जेव्हा माझं कुटुंब येतं, तेव्हा सगळ्या गोष्टी एकीकडे आणि माझं कुटुंब एकीकडे. करिअरच्या बाबतीत पहिलं प्रेम हे अर्थात फॅशन डिझायनिंग. डिझायनिंगविषयी असलेलं माझं प्रेम आणि आस्था तुम्ही रॅम्पवर पाहताच.
- नचिकेत बर्वे, फॅशन डिझायनर

खेळासाठीच सारं
खरं सांगायचं तर टेबलटेनिस हेच आमचं पहिलं प्रेम आहे. लहानपणापासून आम्ही हा खेळ खेळतोय. त्याच्याविना जगण्याची कल्पनाही करणं आमच्यासाठी कठीण आहे. दिवसातला बराचसा वेळ आम्ही या खेळासाठीच घालवतो. जे काही करतो ते या खेळासाठीच. त्यामुळे यातलं विजेतेपद हे आमच्यासाठी व्हॅलेंटाइन गिफ्टसारखं आहे.
- ओमकार तोरगलकर-मधुरिका पाटकर (टेबलटेनिसपटू)