'घुमर' म्हणावं तेवढं सोप्प नव्हतं: दीपिका

मटा ऑनलाइन वृत्त । मुंबई

संजय लीला भन्साळी यांच्या बहुचर्चित 'पद्मावती' चित्रपटातील 'घुमर' गाण्यानं सर्वांनाच वेड लावलं आहे. पण या 'घुमर' गाण्यावर नृत्य करणं दीपिका पादुकोणला 'लय भारी' पडल्याचं समोर आलं आहे.

'पद्मावती'च्या प्रमोशनच्या एका कार्यक्रमात दीपिकानं स्वत: याची कबुली दिली. ‘घुमर’ गाण्यानं सर्वांचीच मनं जिंकली आहेत. पण, घुमर नृत्य करताना दीपिकाला अनेक समस्यांना सामोरं जावं लागलं. या गाण्यात ती तब्बल ६६ वेळा स्वतःभोवती फिरताना दिसते. राणी पद्मिनीच्या भूमिकेसाठी अंगावर घातलेला भरजरी लेहंगा आणि वजनदार दागिने घालून असं फिरणं तिच्यासाठी प्रचंड कठीण गेलं.

'संजय सरांनी दिलेलं हे आजवरचं सर्वात कठीण गाणं होतं. विशेष म्हणजे चित्रपटाचं चित्रीकरण याच गाण्यानं सुरू झाल्यानं तो दिवस मी कधीच विसरू शकत नाही,' असं दीपिका म्हणाली.