बॉलिवूडमध्येही कास्टिंग काऊच होतं : विद्या

मटा ऑनलाइन वृत्त । मुंबई

‘तुम्हारी सुलु’ या चित्रपटाच्या प्रमोशनमध्ये व्यग्र असलेली अभिनेत्री विद्या बालन हिनं नुकतीच एका मुलाखातीत मनमोकळी मतं मांडली. घर आणि ऑफिस अशी तारेवरची कसरत करणाऱ्या महिलांबद्दल ती भरभरून बोलली. तसेच बॉलिवूडमधील कास्टिंग काऊच्या मुद्द्यावरही तिनं भाष्य केलं.

मध्यमवर्गीय घरात जन्माला आल्यानं हा विषय एकदम जवळचा वाटला. त्यामुळं लगेचच हा चित्रपट करण्यास होकार दिला. आजकाल महिला सर्व क्षेत्रात पुढे येत आहेत. आपली स्वप्नं पूर्ण करण्यासाठी धडपडत आहेत. पण तरीही त्यांना आपलं घर सांभाळून मगच आपल्या करिअरला प्राधान्य दयावं लागतं. घराकडं लक्ष दिलं नाहीतर त्यांनाच या गोष्टीची खंत वाटत राहते. अशीच गोष्ट या चित्रपटातील सुलोचनाची आहे. ती एक सामान्य गृहिणी आहे. तिच्या आयुष्याभोवती फिरणारं कथानक या चित्रपटात आहे. विद्या साकारत असलेली सुलोचना इतर महिलांपेक्षा जरा वेगळी आहे.

तसेच बॉलिवूडमधील कास्टिंगबद्दल विचारलं असता; एखादी भूमिका किंवा मोठा ब्रेक हवा असेल, तर काही निर्माते नवोदितांना ‘कॉम्प्रोमाइज’ करण्यासाठी सांगतात, असं विद्यानं सांगितलं. वैयक्तिक आयुष्यात आपल्याला असा अनुभव आला नसल्याचं ती म्हणाली. मुलींना पुरुषांच्या वाईट नजरेपासून वाचण्यासाठी काही सल्ला देण्याऐवजी पुरुषांनीच मर्यादेत रहावं, आपली दृष्टी बदलावी, असं विद्याने सांगितलं.

सोशल मीडियाच्या वापरावरही तिनं आपलं मत व्यक्त केलं. तिच्या मते कलाकारांच्या वक्तव्यांना अर्थ असो वा नसो त्यातून वाद निर्माण करण्याचं एक अजब तंत्र माध्यमांना साध्य झालं आहे. यातून केवळ बोलाचेच वाद रंगतात. हाती मात्र काहीच लागत नाही असं म्हणते.

बॉडी शेपिंगच्या मुद्यावरही विद्या बोलली होती. 'माझ्या वाढलेल्या वजनाबद्दल लोक बोलत राहतील. कारण त्यांचा दृष्टिकोन कधीच बदलणार नाही. पण आता मला त्याची पर्वा नाही,’ असे विद्यानं या मुलाखतीत सांगितलं.'