हक्काला जागले

मंगळवारी सगळीकडे चर्चा होती ती बोटांवर लागणाऱ्या काळ्या शाईच्या जादूची. हिंदी-मराठी इंडस्ट्रीतले सेलिब्रिटीजही न चुकता मतदानाला उतरले होते. मुंबईबरोबरच नाशिक, पुणे इथे राहणाऱ्या कलाकारांनी तिथे जाऊन मतदानाचा हक्क बजावला. फक्त स्वतः मतदान करूनच ते थांबले नाहीत, तर सोशल मीडियावर आपले वोटिंगचे फोटो टाकून लोकांनाही मतदान करण्याचं आवाहन त्यांनी केलं.

सोनालीचं कौतुक
अभिनेत्री सोनाली कुलकर्णीनं वोटिंग ग्लॅमरस असल्याचा संदेश एका फलकावर लिहून तो सोशल मीडियावर टाकला होता. इंडस्ट्रीत याची खूप चर्चा झाली. अभिनेत्री अमृता खानविलकरनं ट्विटरवर याबद्दल तिचं कौतुकही केलं.

नशीब बदलू शकतं
अभिनेता पुष्कर श्रोत्रीनंही मतदानाचं महत्त्व सांगण्यासाठी चार ओळींचा संदेश लिहून तो सोशल मीडियावर पोस्ट केला. तुमचं एक मत नशीब कसं बदलू शकतं हे त्याने त्यात सांगितलं होतं.

गायिका-अभिनेत्री आर्या आंबेकरनं मतदान केलं. ती म्हणाली, की 'मतदान केल्यावर जबाबदार नागरिक असल्यासारखं वाटतंय. आपल्या देशाची लोकसंख्या बघता त्यातले ६५% लोक हे नोकरी-व्यवसाय करणारे आहेत. त्यातही तरुणाईचं प्रमाण अधिक आहे. नवी पिढी ही खुल्या विचारांची आहे, जी नीट अभ्यास करूनच विचारपूर्वक मतदान करते. एक जागरुक नागरिक म्हणून मीसुद्धा माझा मतदानाचा हक्क बजावला.'

कॉलेज की मतदान?
नवी मुंबईतल्या कॉलेजांना मंगळवारी सुटी नसल्यानं तिथे लेक्चर्स, असाइनमेंट्स, परीक्षा नेहमीप्रमाणे सुरू होत्या. पण या कॉलेजांमध्ये जाणाऱ्या विद्यार्थ्यांमध्ये मुंबईकर विद्यार्थ्यांची संख्या अधिक असल्यानं, कॉलेजला जावं की मतदानाला असा प्रश्न आम्हाला पडला होता, असं अनेक विद्यार्थ्यांनी मुंटाला सांगितलं.

आर्ची-परशाचं काय?
तरुणाईमध्ये तुफान क्रेझ असलेले सैराटफेम आकाश ठोसर आणि रिंकू राजगुरु या दोघांची निवडणूक आयोगाने ब्रँड अॅम्बेसेडर म्हणून निवड केली खरी. पण मतदानाचा टक्का वाढावा म्हणून त्यांनी नेमकं काय केलं असा प्रश्न तरुणाईमधून विचारला जात होता. त्यांचे याबाबतचे अनुभव, त्यांनी केलेलं काम जाणून घेण्यासाठी मुंटानं दोघांनीही सातत्यानं फोन करण्याचा प्रयत्न केला असता, दोघांचेही फोन नॉट रिचेबल होते.