Amitabh Bachchan: वुई आर ‘एबी फॅमिली’

दर रविवारी संध्याकाळी न चुकता ते 'जलसा'वर येतात. व्हॉटसअॅपवर त्यांचा एक ग्रुप झाला असून, या ग्रुपमध्ये परदेशातली काही मंडळीही आहेत. हा आहे 'अमिताभ बच्चन एक्सटेंडेड फॅमिली' ग्रुप. बिग बींच्या ७६ व्या वाढदिवसानिमित्त या ग्रुपबद्दल जाणून घेऊ या...

विनय राऊळ

दर रविवारी दुपारपासूनच 'जलसा'च्या गेटबाहेर गर्दी होऊ लागते. आलेल्या सर्वांना आस असते ती त्यांच्या एका दर्शनाची. हे वाचून तुमच्या लक्षात आलं असेलच की आम्ही कुणाबद्दल बोलतोय. महानायक अमिताभ बच्चन यांचा गुरुवारी ७६वा वाढदिवस आहे. दर रविवारी त्यांच्या बंगल्याबाहेर होणाऱ्या गर्दीमध्ये एक ग्रुप असाही असतो ज्यातले बहुतांश सदस्य न चुकता तिथे येतात. 'अमिताभ बच्चन एक्सटेंडेड फॅमिली' असं या ग्रुपचं नाव आहे. या ग्रुपमध्ये जवळपास दोनशे ते अडीचशे लोक आहेत. बच्चन यांच्या घराबाहेरच्या गर्दीमध्ये आणि सोशल मीडियावरच्या फॅन्स क्लबद्वारे एकमेकांशी झालेली मैत्री यातून हा ग्रुप तयार झाला आहे. त्यांच्यातले काही जण जमेल त्या रविवारी येऊन बिग बींच्या जुहूमधल्या जलसा या घराबाहेर एकत्र भेटतात.

बिग बींशी संबंधित प्रत्येक गोष्टीची त्यांच्या व्हॉट्सअॅप ग्रुपमध्ये चर्चा होते. या ग्रुपमध्ये सध्या परदेशी राहत असलेले बिग बींचे काही चाहते आहेत. काही जण अमिताभ यांच्या सिनेमातल्या लूकमध्ये येतात. काही त्यांच्यासाठी फोटो, पेंटिंग्ज आणि इतर वस्तू भेट म्हणून घेऊन येतात.

चाहत्यांच्या नाना तऱ्हा

या ग्रुपमध्ये बिग बींचा एक चाहता आहे. जो एका मिनिटामध्ये त्यांच्या दीडशे चित्रपटांची नाव ऐकवू शकतो. वसईचा जफर शेख गेल्या कित्येक वर्षांपासून बिग बींना फॉलो करत आला आहे. अंधेरीमध्ये त्याचा चावी बनवण्याचा स्टॉल आहे. दर रविवारी न चुकता तो बच्चन यांच्या सिनेमामधल्या एखाद्या लूकमध्ये येतो. 'माझे वडील जेव्हा लहानपणी मला केस कापून घेण्यासाठी घेऊन जायचे तेव्हाच त्या न्हाव्याला सांगायचे, याचे केस बच्चन यांच्यासारखे काप. त्यामुळे तेव्हापासून त्यांचा चाहता आहे', असं तो म्हणाला. या ग्रुपमध्ये काही महिलाही आहेत. नम्रता पंडित नावाच्या एक महिला दर रविवारी 'जलसा'वर येतात. 'माझ्या नवऱ्यालाही माहित आहे की रविवारी न चुकता मी बच्चन यांच्या बंगल्याबाहेर येतेच. त्यांचा मला पाठिंबा असतो', असं त्या म्हणाल्या.

अवयवदानाचं आवाहन

यावर्षी 'अमिताभ बच्चन एक्सटेंडेड फॅमिली' या ग्रुपच्या वतीनं अवयवदानाचं आवाहन करण्यात येणार आहे. या ग्रुपनं सोशल मीडियावरही याबाबत जनजागृती केली आहे. बिग बींच्या वाढदिवसानिमित्त हा उपक्रम या ग्रुपमार्फत राबवला जाणार आहे. गुरुवारी सकाळी बिग बींच्या घराबाहेर हा संपूर्ण ग्रुप भेटणार आहे.

भावूक बिग बी

बिग बींना वाढदिवसानिमित्त केबीसीमध्ये खास भेट देण्यात येणार आहे. त्यांच्या मातोश्री तेजी बच्चन यांच्या आवाजातलं एक गाणं खास बच्चन यांना ऐकवलं जाणार आहे. 'आजवर मी कधीच आईला गाताना पाहिलं नव्हतं. आज तिचा आवाज ऐकून मी खूप भावूक झालो', असं ते यावेळी म्हणाले.

फोटो: विनय राऊळ