मे महिना वेब‘फुल्ल’; एकामागोमाग एक वेब सीरिज चर्चेत

एकामागोमाग एक वेब सीरिज चर्चेत

टीव्ही, चित्रपट, नाटक ही मनोरंजनाची माध्यमं थंडावली असताना ओटीटी प्लॅटफॉर्मची मात्र घोडदौड जोरात सुरू आहे. मे महिन्यात एकामागोमाग एक वेब सीरिज येत असून, हा महिना वेब'फुल्ल' असणार आहे.

शब्दुली कुलकर्णी

लॉकडाउनमुळे गेल्या दोन महिन्यांपासून टीव्ही आणि चित्रपटांचं चित्रीकरण पूर्णपणे बंद आहे. त्यामुळे मालिकांचे नवे एपिसोड्स दिसत नाहीत आणि चित्रपटगृहं बंद असल्यानं नवे सिनेमे पाहता येत नाहीत. या परिस्थितीत घरी बसलेले प्रेक्षक मनोरंजनासाठी ओटीटी प्लॅटफॉर्म्सकडे मोठ्या प्रमाणावर वळले आहेत. प्रेक्षकांची वाढती पसंती लक्षात घेता, एकामागोमाग एक वेब सीरिज येत आहेत. त्यामुळे मे महिना वेब'फुल्ल' असल्याचं चित्र पाहायला मिळतंय.

लॉकडाउनमुळे गेले जवळपास दोन महिने कुठलंही चित्रीकरण होऊ शकलेलं नाही. त्यामुळे मनोरंजनाची कार्यक्रमांची वानवा असताना ओटीटी प्लॅटफॉर्म्स मात्र प्रेक्षकांचं मनोरंजन करण्यात यशस्वी ठरत आहेत. गेल्या काही दिवसांमध्ये प्रदर्शित झालेल्या 'बारीश २' आणि 'पाताल लोक' या सीरिजची जबरदस्त चर्चा आहे. सध्याच्या सीरिजचा देसी तडका प्रेक्षकांना भावत आहे. 'कैसा है पाताल लोक' या एका संवादानं प्रेक्षकांना भुरळ घातली आहे. अनुष्का शर्माची निर्मिती असलेली 'पाताल लोक'चं कौतुक प्रेक्षकांसह अनेक सेलिब्रिटी करत आहेत. यासोबत काही दिवसांपूर्वी प्रदर्शित झालेली 'बारीश २' ही सीरिजही लोकांचं मनोरंजन करण्यात यशस्वी ठरली आहे. तसंच मागच्या आठवड्यात प्रदर्शित झालेले 'ऑफिशिअल भूतियागिरी', 'रिजेक्स २', 'इललीगल' आणि 'लूजर' या सीरिजनाही प्रेक्षकांची पसंती लाभली. आगामी दोन आठवडे ओटीटीच्या दृष्टीनं महत्त्वाचे ठरणार आहेत. त्या काळात 'बेताल', 'काली २' या हिंदी तर 'होमकमिंग २' ही इंग्रजी सीरिज प्रदर्शित होणार आहे. या तिन्ही सीरिजची सोशल मीडियावर जबरदस्त चर्चा आहे. तसंच, जून महिन्याच्या सुरुवातीला 'द कसिनो' आणि 'कहेने को हमसफर है ३' या सीरिज प्रदर्शित होणार आहेत.

कलाकारांची जादू

गेले काही दिवस ओटीटीवर काही कलाकार पदार्पण करत आहेत. अनेकांना या माध्यमानं भुरळ घातली आहे. काही दिवसांपूर्वी रिंकू राजगुरुनं ओटीटीवर पदार्पण केलं. त्याच सीरिजमधून लारा दत्ताही दीर्घकाळानं प्रेक्षकांसमोर आली. तसंच 'ऑफिशिअल भूतियागिरी'च्या माध्यमातून बऱ्याच दिवसांनी सुमीत व्यासला ओटीटीवर बघायला मिळाल्यानं चाहते खूश आहेत. विशेष म्हणजे 'सेक्रेड गेम्स'च्या पहिल्या सीझनमधून प्रेक्षकांवर मोहिनी घालणारा अभिनेता जितेंद्र जोशी आगामी 'बेताल' सीरिजच्या माध्यमातून प्रेक्षकांच्या भेटीला येतोय. त्याच्या पात्राची सध्या सोशल मीडियावर जबरदस्त चर्चा आहे.

० वेगळ्या धाटणीचा विषय मांडणारी 'पाताल लोक' ही वेब सीरिज अल्पावधीतच प्रेक्षकांच्या पसंतीस उतरली. याबद्दल निर्माती अनुष्का शर्माचं सोशल मीडियावर कौतुक होतंय. सीरिजच्या टीमचं कौतुक करणारी पोस्ट क्रिकेटपटू विराट कोहलीनं केली आहे.

० काही दिवसांपूर्वी आलेल्या 'एक थी बेगम' या सीरिजलाही तुफान प्रतिसाद मिळाला. प्रेक्षकांनी जोरदार प्रतिसाद दिल्यानं सीरिजच्या दुसऱ्या सीझनचं काम सुरू झाल्याचं कळतंय.

सध्याच्या काळात ओटीटीसारखं नवं माध्यम खूप गाजतंय. कारण ते एकमेव मनोरंजनाचं माध्यम उपलब्ध आहे. लॉकडाउनमुळे मनोरंजनाची इतर माध्यमं थंडावली असताना सीरिज एकामागोमाग एक प्रदर्शित होत आहेत. निखळ मनोरंजन होत असल्यामुळे प्रेक्षकांचा वेळ चांगला जातोय आणि प्लॅटफॉर्म्सनाही याचा आर्थिक फायदा होतोय.

- वरुण नार्वेकर, दिग्दर्शक