टीम मटा नाताळचा सण जवळ आला, की सांता आपल्यासाठी काय घेऊन येणार याची उत्सुकता सगळ्यांना असते. याच काळात अनेक ठिकाणी सिक्रेट सांता हा गेम खेळला जातो. त्यामुळे आपल्याला गिफ्ट काय मिळणार याची उत्सुकता आणखी ताणली जाते. याच पार्श्वभूमीवर यंदा मराठी इंडस्ट्रीतल्या काही कलाकरांनी स्वतः सिक्रेट सांता होत बॉलिवूडकरांना या निमित्तानं खास शुभेच्छा दिल्या आहेत. सध्या सर्वाधिक चर्चेत असलेला बॉलिवूडचा अतरंगी कलाकार म्हणजे रणवीर सिंग. काही दिवसांपूर्वीच रणवीर आणि त्यांच्या सहकलाकारांनी लंडन येथे आगामी '८३' या चित्रपटाचं चित्रीकरण पूर्ण केलं. या चित्रपटात माजी क्रिकेटपटू संदीप पाटील यांची भूमिका त्यांचाच मुलगा चिराग पाटील साकारतोय. चिरागनं नाताळच्या निमित्त एक खास संदेश रणवीरसाठी शेअर केला आहे. तो असा, 'चित्रपटाच्या चित्रीकरणापूर्वी क्रिकेटचा सराव सुरू असताना मी बॅटिंग करत होतो. खरं तर मी फार क्रिकेट खेळत नाही. लहानपणीही मी कधीच क्रिकेट खेळलो नाही; पण सरावाच्या वेळी माझी बॅटिंग बघून रणवीरनं माझं कौतुक केलं होतं. 'तुझ्या बाबांसारखीच तुझी देखील देहबोली आहे,' असं तो म्हणाला होता. त्या चार महिन्यात रणवीरसोबतचा प्रत्येक दिवस खूप ऊर्जादायी होता. तो आजूबाजूला असल्यावर आमच्या शरीरातही उत्साह संचारत असे. त्यामुळे तो नेहमी असाच ऊर्जादायी असावा अशी शुभेच्छा देतो.' 'कबीर सिंग' या चित्रपटातलं वनिता खरातचं धावण्याचं दृश्य भाव खाऊन गेलं. हे दृश्य सोशल मीडियावर भलतंच व्हायरल झालं होतं. या चित्रपटानिमित्त वनिताला शाहिद कपूरसोबत काम करण्याची संधी मिळाली. नाताळच्या पार्श्वभूमीवर वनिता शाहिद कपूरला सांगू इच्छिते, 'शाहिद एक उत्कृष्ट सहकलाकार आहे. कारण तो उत्तम श्रोता आहे. तो समोरच्याचं प्रत्येक वाक्य आणि शब्द जाणीवपूर्वक ऐकतो आणि मग रिअॅक्ट होतो. त्यामुळेच त्याचा अभिनय वास्तविक वाटतो. माझे नाटकातील मित्र-मैत्रिणी मला नेहमी सांगतात, की शाहिदला आपलं नाटक बघायला बोलावं. आता सिक्रेट सांता होऊन मी शाहिदला नाटकाचं आमंत्रण देते.' काही महिन्यांपूर्वी प्रदर्शित झालेला 'द झोया फॅक्टर' या चित्रपटात सचिन तेंडुलकरसारखी दिसणारी एक व्यक्तिरेखा सर्वांनाच आवडली. ही व्यक्तिरेखा साकारणारा सचिन देशपांडे या चित्रपटाचा नायक दुलकर सलमानसाठी सिक्रेट सांता होऊ इच्छितो. या निमित्तानं तो दुलकरला सांगतोय, 'दुलकर एक उत्तम अभिनेता आहेच आणि तो तितकाच चांगला माणूसही आहे. तो दाक्षिणात्य इंडस्ट्रीतला सुपरस्टार असूनही त्यानं बडेजाव केला नाही. तो संपूर्ण युनिटला एकत्र बांधून ठेवायचा. वयानं लहान व्यक्तीशी तो कधीच मोठ्या आवाजात बोलला नाही. सोबतच तो मोठ्या मनानं समोरच्याचं कौतुक करतो. सोशल मीडियाच्या माध्यामातूनही तो सहकलाकारांचे फोटो आणि व्हिडिओ शेअर करत असतो. दुलकरनं कायम असंच स्वछंदी राहावं; याच त्याला नाताळच्या शुभेच्छा आहेत.' त्याचप्रमाणे आगामी 'मलंग' या बॉलिवूडपटात अभिनेता आदित्य रॉय कपूर आणि मराठमोळा अभिनेता प्रसाद जवादे एकत्र दिसणार आहेत. आदित्यविषयी प्रसाद सांगतो, 'एकदा सेटवर शूटिंगच्या मधल्या वेळेत आम्ही बोलत बसलो होतो. तेव्हा आदित्यला कळलं, की मी रंगभूमीवर सक्रिय आहे. तेव्हा त्यानंही एखाद्या नाटकामध्ये काम करण्याची इच्छा माझ्यासमोर बोलून दाखवली. त्यामुळे त्यानं लवकरात लवकर नाटक करावं आणि त्यात मीदेखील असावं, अशी सिक्रेट सांता म्हणून माझी इच्छा आहे.'
सांता बोले तो...
 टीम मटानाताळचा सण जवळ आला, की सांता आपल्यासाठी काय घेऊन येणार याची उत्सुकता सगळ्यांना असते...
महाराष्ट्र टाइम्स.कॉम 26 Dec 2019, 4:00 am