असं काय केलं की रितेशला खावा लागला जेनेलियाकडून मार; हा मजेशीर व्हिडीओ एकदा पाहाच!

मुंबई ः सोशल मीडियावर सर्वात सक्रीय असणारी जोडी कोणती असा प्रश्न जर कुणी विचारला तर त्याचे उत्तर रितेश देशमुख आणि जेनेलिया डिसुझा हेच येईल. बॉलिवूडमधील 'आदर्श कपल' म्हणून या जोडीकडे पाहिले जाते. त्यांचे एकमेकांवर किती प्रेम आहे, हे सोशल मीडिया अकाऊंटवर त्यांनी पोस्ट केलेल्या फोटो, व्हिडीओजच्या माध्यमातून दिसून येतेच. त्यांचे हे व्हिडीओ आणि फोटोंवर केवळ त्यांचे चाहतेच नाही तर अनेक सेलिब्रिटी देखील प्रतिक्रिया देत असतात. जेनेलियाने नुकताच एक भन्नाट व्हिडीओ पोस्ट केला असून, त्यामध्ये ती रितेशला तू असे का वागलास असा जाब विचारत त्याची रागारागाने एका हाताने धुलाई करत असल्याचे दिसत आहे... इतकेच नाही तर हा व्हिडीओ सोशल मीडियावर पोस्ट करताना तिने रितेशबरोबरच प्रिती झिंटा हिला देखील टॅग केले आहे...


जेनेलियाने हा व्हिडीओ तिच्या ट्विटर अकाऊंटवर शेअर केला आहे. ‘व्हायरल व्हिडीओमधील प्रेमासाठी… रितेश आणि क्यूट प्रितीसाठी’ अशी फोटोओळ तिने या व्हिडीओला दिली आहे. काही सेकंदाच्या या व्हिडीओमध्ये सुरुवातीला एका कार्यक्रमात रितेश देशमुख अभिनेत्री प्रिती झिंटा हिला भेटतो आणि तिला प्रेमाने मिठी मारत तिच्याशी अतिशय आपुलकीने गप्पा मारताना दिसत आहे. हे सगळे सुरू असताना जेनेलिया तेथे मागे उभी राहून सर्व बघत असते. तिच्या चेह-यावरील हावभाव पाहून ती चांगलीच अस्वस्थ आणि प्रचंड रागावलेली दिसते... त्यानंतर घरी पोहोचल्यावर जेनेलिया रितेशची 'क्या किया क्या किया' या गाण्यावर एका हाताने चांगली धुलाई करत असून रितेशही तिला गाण्यातूनच उत्तर देत असल्याचे दाखवले आहे. त्यांचा हा मजेशीर व्हिडीओ सध्या सोशल मीडियावर चर्चेत आहे. अनेकांनी यावर कमेंट केल्या आहेत. विशेष म्हणजे जेनेलियाने हा व्हिडीओ प्रिती झिंटाला देखील टॅग केला असून, ती याच्यावर काय प्रतिक्रिया देते हे पाहणे उत्सुकतेचे आहे.
दरम्यान, काही दिवसांपूर्वी देखील जेनेलियाने त्या दोघांचा एक व्हिडीओ पोस्ट केला होता. त्यामध्ये जेनेलियाच्या हाताला दुखापती झालेली असल्याने रितेश तिचे केस बांधताना दिसत आहे. हा व्हिडीओ शेअर करत जेनेलिया लिहिते, ' असा कुणीतरी हवाय जो माझ्या वाईट दिवसांतदेखील माझ्यावर प्रेम करेल.' या दोघांचा हा व्हिडीओ सोशल मीडियावर प्रचंड वायरल झाला होता.

रितेश आणि जेनेलिया यांनी ‘तुझे मेरी कसम’ या सिनेमात एकत्र काम केले होते. त्यानंतर ते दोघे एकमेकांच्या प्रेमात पडले आणि त्यानंतर त्यांनी ३ फेब्रुवारी २०१२ मध्ये लग्न केले. या दोघांना दोन मुले रिआन आणि राहिल अशी त्यांची नावे आहेत. रितेश आणि जेनेलिया सोशल मीडियावर सक्रिय असतात आणि आपल्या चाहत्यांशी संवादही साधत असतात. तसेच ते अधूनमधून आपल्या मुलांसोबतचे त्यांचे फोटो आणि व्हिडीओ देखील हे दोघे सोशल मीडियावर पोस्ट करत असतात.