स्टार असूनही त्या गोष्टीपासून लांबच आहे सैराटमधला परशा, म्हणाला गरजेपुरतं....

‘सैराट’च्या नेत्रदीपक यशानंतर ‘एफयू’, ‘झुंड’ आणि अलीकडे ‘घर, बंदूक बिरयानी’ या चित्रपटांत आकाश ठोसर झळकला. त्यापूर्वी ‘१९६२ ः द वॉर इन द हिल्स’, ‘लस्ट स्टोरीज’ या सीरीजमध्येही त्यानं काम केलं. त्याच्या प्रवासाबद्दल झालेल्या गप्पा.

‘सैराट’ला सात वर्षं पूर्ण होतील. ‘परशा’ ही ओळख ओलांडून पुढं जाण्यासाठी काय करीत आहेस?
- सात वर्षं होऊनही आजही रसिकांचं तेवढंच प्रेम मिळत आहे. मला त्या भूमिकेच्या नावानंच ओळखलं जातं आहे. हे फार कमी लोकांच्या वाट्याला येतं. एखाद्या दुर्गम भागातल्या ट्रेकला गेल्यावर तिथल्या पाड्यावरची मुलं आणि आजी अशा दोन पिढ्यांची माणसंही जेव्हा ‘परशा’ म्हणून ओळख देतात तेव्हा छान वाटतं. प्रत्येक भूमिकेतून बाहेर पडावं लागतंच. मात्र, ही ओळख पुसण्यापेक्षा ती कायम ठेवून सगळ्या प्रकारच्या भूमिका साकारच्या आहेत. ज्यांना परशाइतकंच प्रेम मिळावं.

आतापर्यंतच्या प्रवासाबद्दल काय वाटतं... ग्रामीण भागातल्या मुलांसाठी तुझं आणि रिंकू राजगुरुचं यश या क्षेत्राबद्दल सकारात्मक विचार देणारं ठरलं...
- माझ्यासाठी हा प्रवास अजूनही स्वप्नवतच आहे. मी इथं असेन असा विचारही कधी केला नव्हता, ना असं काही स्वप्नं पाहिलं होतं. मी मध्यमवर्गीय कुटुंबातला मुलगा आहे. सरकारी नोकरी करावी आणि आई-वडीलांसाठी छान घर घर बांधावं असं मनांत होतं. पोलिस आणि आर्मी भरतीसाठी गेलो आणि स्पर्धा परीक्षेचाही विचार केला. मात्र, आता या क्षेत्रात स्थिरावल्यानं पालकांनाही समाधान वाटतं. प्रेक्षकांचं प्रेम सोबत आहेच.
उगाच नाही प्रेक्षकांनी उलचून धरली मालिका, हे आहे 'ठरलं तर मग'चं वेगळंपण

आजच्या काळाची गरज अजूनही तू सोशल मीडियावर फारसा दिसत नाहीस, याचं काही खास कारण?
- सतत तिथं असण्याची गरज वाटत नाही. मला निवांत राहायला आवडतं. ट्रेकिंग आणि खाणं या दोन गोष्टींसाठी माझी सतत भ्रमंती सुरू असते. या सगळ्याच गोष्टींची सोशल मीडियावर पोस्ट कशासाठी करायची, असा प्रश्न मला पडतो. मी माझे क्षण मजेत जगत आहे आणि मला तसंच जगायला आवडतं. चित्रपट वा प्रमोशननिमित्त जितकं इथं असायला हवं, तितकाच मी असतो.

करिअरच्या सुरुवतीलाच अमिताभ बच्चन यांच्यासारखा महानायक असो वा इतरही प्रसिद्ध अभिनेत्यांसोबत तुला काम करण्याची संधी मिळाली...- बच्चनसाहेबांबद्दल काय बोलावं, लहानपणापासूनची नायकाची छबी आणि त्यांच्यासोबत काम करण्याची संधी हेच स्वप्नवत आहे. नुकतंच सयाजी शिंदे यांच्यासोबतही काम केलं. आधी मला टेन्शन होतं; पण पहिल्याच भेटीत त्यांनी मिठी मारली आणि ते दूर झालं. काम करताना मोलाचं मार्गदर्शनही केलं. अनुभवी कलाकारांकडून असं मार्गदर्शन मिळालं, तर आपसूकच तुमचं काम चांगलं होतं. आगामी काळातही मला अशाच संधी मिळत राहाव्यात, ही इच्छा आहे.