उत्तम चित्रकार

मराठी मालिका आणि चित्रपटातून प्रेक्षकांवर भुरळ पाडणारी, उत्तम डान्सर आणि स्वभावाने गोड अशी अभिनेत्री संस्कृती बालगुडे हिचा आज वाढदिवस आहे. यानिमित्तानं संस्कृती बद्दलच्या काही गोष्टी तिचा सच्चा दोस्त अभिनेता भूषण प्रधान यानं सांगितल्या आहेत.

तुमच्या दोघांमध्ये मैत्री कशी झाली?
- 'पिंजरा' मालिकेच्या सेटवर आमची पहिल्यांदा ओळख झाली आणि तिथून मैत्रीची सुरूवात झाली. ती मैत्री अजूनही तशीच आहे.

संस्कृतीला भेट द्यायची झाली तर काय देशील आणि का?
-संस्कृती उत्तम चित्र काढते. तिनं काढलेली उत्कृष्ट चित्रं सोशल मीडियावर आपण बघतो. त्यामुळे मी तिला रंग आणि कॅनव्हास भेट म्हणून देईन.

संस्कृतीनं बनवलेलं कधी काही खाल्लं आहेस का?
- तिनं बनवलेलं अद्याप कोणीच खालेल्लं नाही.

तिचा कोणता चित्रपट तुला जास्त आवडतो?
- 'सांगतो ऐका'मधलं तिचं काम मला खूप आवडतं. त्यात तिची आईची भूमिका होती आणि तिनं ती उत्कृष्टरित्या निभावली होती.

तुमच्या दोघांमधला घडलेला एखादा किस्सा कोणता?
- एके वर्षी मी संस्कृतीचा वाढदिवस विसरलो होतो. तिला शुभेच्छा दिल्या नव्हत्या. त्यामुळे ती माझ्यावर खूप चिडली होती आणि कित्येक महिने ती माझ्याशी बोलत नव्हती. तेव्हापासून आजतगायत मी तिचा वाढदिवस कधीही विसरलेलो नाही.

तू संस्कृतीला कोणत्या टोपण नावानं हाक मारतोस? आणि ते नाव कसं पडलं?
- माझ्याकडे संस्कृतीच्या टोपण नावांची यादी आहे. पिंजराच्या सेटवर तिला सगळे सोनू म्हणायचे तर तिच्या घरचे तिला बिट्टा असं लहानपणापासून म्हणतात. माझ्या मोबाइलमध्ये तिचं हेच नाव सेव्ह आहे.

संस्कृतीच्या 'चिट डे'बद्दल तुझं काय म्हणणं आहे?
तिच्यासाठी 'चिट डे' तर रोजच असतो. कारण तिला विविध पदार्थ खायला खूप आवडतात.

संस्कृती म्हणजे काय हे एका शब्दात कसं सांगशील?
- बहुगुणसंपन्न. कारण तिला सगळंच येतं.

कोणत्या गोष्टीशिवाय तिला चैन पडत नाही?
- डान्स. संस्कृती डान्सशिवाय जगूच शकत नाही.

संस्कृतीनं स्वतःमध्ये काय बदल करायला हवा असं तुला वाटतं?
- ती खूप हळवी आहे. एकाअर्थी ते चांगलंच आहे. कारण हल्ली हा हळवेपणा बघायला मिळत नाही. पण तरीही तिनं थोडं खंबीर व्हायला हवं, असं मला वाटतं.

शब्दांकन- संपदा जोशी, निर्मला निकेतन