लपवाल तर गमवाल!

दीपिकानंतर दिग्दर्शक करण जोहर त्याच्या क्लिनिकल डिप्रेशनबद्दल जाहीरपणे बोलला आहे. गेली दोन वर्ष तो या समस्येचा सामना करतोय. आपल्याकडे मानसिक आजारांकडे बघण्याचा एकूणच दृष्टिकोन, त्यामुळे होणारं नुकसान यावर तो १० अॉक्टोबरला असलेल्या ‘जागतिक मानसिक आरोग्य दिना’निमित्त मोकळेपणानं व्यक्त झाला. ‘इत्तेफाक’ या करणच्या आगामी चित्रपटाच्या ट्रेलर लाँचिंगच्या निमित्तानं त्यानं ‘मुंटा’शी साधलेला हा संवाद…

प्रत्येक माणसाचं ‘स्टेट ऑफ माइंड’ काळानुसार बदलत जातं. खूप वर्षांपासूनचे न विसरता आलेले दुःखद प्रसंग आत साचून राहतात. आणि मग डिप्रेशन, अँझायटी यासारख्या मानसिक आजारांना आपण सामोरे जातो. आपल्याला मानसिक प्रॉब्लेम आहे हे कळलं तर लोक आपल्याला कसं वागवतील याचा विचार करून आपणही ते लपवतो. ‘मूड खराब आहे, विशेष काही नाही. आज नाही तर उद्या ठीक होईल’ असं म्हणत आपण स्वतःलाच समजावतो. पण यामुळे आपलं नुकसान होतंय हे आपल्या लक्षातच येत नाही.

आपल्याकडे मधुमेह, हृदयविकार, रक्तदाब यासारख्या आजारांवर सहज बोललं जातं. पण डिप्रेशन किंवा एखाद्या मानसिक आजारावर सगळ्यांसमोर बोलताना मात्र जरा हातचं राखून वागतो. तसं व्हायला नको. सिनेमे आणि इतर माध्यमातून हे विषय सगळ्यांसमोर येताहेत. कारण आपल्याला हा आजार आहे हे कळणंच मुळी कठीण आहे. ‘मूड ठीक नाही’च्या नावाखाली आपण स्वतःचं खूप नुकसान करून घेतोय. भविष्याबाबतची अतिचिंता, तीव्र दुःख वाटणं या सगळ्या गोष्टींमधून मी गेलोय. पण, वेळीच ही गोष्ट जाणून घेतली आणि स्वतःला सावरलं. आता मात्र मी माझ्या मानसिक आजारावर मोकळेपणानं बोलतो, चर्चा करतो. लपवून ठेवलं तर ही गोष्ट आणखी वाढू शकते. म्हणूनच समजून घ्या आणि बिनधास्त बोला.

- करण जोहर,
निर्माता-दिग्दर्शक