​ बोलते आणि जोडते

आरजे मंडळी आपल्या चटपटीत, प्रभावी बोलण्याने श्रोत्यांना जिंकून घेतात. आरजे शोनाली हे नाव रेडिओच्या दुनियेत प्रसिद्ध आहे. भाषा हवी तशी वळवता यावी यासाठी ‌ती नेमकं काय करते ते तिनं मुंटाच्या माध्यमातून तुम्हालाही सांगितलं आहे…

कुठल्याही आरजेसाठी भाषेवर प्रभुत्व असणं हे खूप महत्त्वाचं असतं. तुम्ही तुमच्या बोलण्यातून लोकांना किती चांगल्या प्रकारे खिळवून ठेवता यावर तुमचं कौशल्य अवलंबून असतं. आजकाल बहुभाषिक संस्कृतीचा प्रभाव वाढल्याने प्रत्येक आरजेला मराठीबरोबरच इतर भाषांचाही वापर करावा लागतो. पण आमच्या बोलण्यात जास्तीत जास्त मराठीचा वापर आम्ही करतो. त्यामुळे आम्हाला मराठी भाषेबद्दल, मराठी साहित्याबद्दल चांगली माहिती असणंही महत्त्वाचं असतं.

सहा वर्षांपूर्वी मी जेव्हा औरंगाबादहून पुण्यात आले तेव्हा मनात धाकधूक होतीच. कारण पुण्याची मराठी भाषा किती शुद्ध आहे याचा आपल्याला अंदाज आहेच. मग हळुहळू मी त्यासाठी मेहनत घ्यायला सुरुवात केली. खूप वाचन केलं. रोजचं वर्तमानपत्र, पुस्तकं वाचली. उच्चार शुद्ध होण्यासाठी सगळ्यात जास्त मदत झाली ती संस्कृत भाषेची. मी आजही दिवसातून किमान एकदा तरी संस्कृत श्लोक मोठ्याने म्हणते. यामुळे भाषा वळवणं सोपं जातं आणि उच्चारही स्पष्ट होतात.

तुम्ही जिथे आरजे आहात तिथली स्थानिक बोलीभाषाही लक्षात घ्यावी लागते. यामुळे तुम्ही श्रोत्यांशी थेट संवाद साधू शकता. मुंबईत असाल तर शुद्ध मराठीबरोबरच थोडी मुंबैया मराठी येणंही गरजेचं आहे. यामुळे जास्तीत जास्त प्रेक्षक तुमचं बोलणं ऐकायला उत्सुक असतो. श्रोते तुमच्या चुका खूप लवकर पकडत असतात. त्यामुळे प्रत्येकवेळी खूप काळजीपूर्वक बोलावं लागतं आणि त्यासाठी तुमची भाषासंपत्ती चांगली असण्याला पर्याय नसतो. माझे अनेक अमराठी श्रोते मला फोन करून किंवा सोशल मीडियावर जेव्हा सांगतात की, 'तुमचा शो ऐकून आता आम्हीही मराठी शिकतो आहोत' तेव्हा तो माझ्यासाठी अभिमानाचा क्षण असतो.
- शो शो शोनाली, आरजे