आयुष्यातले ते क्षण मला निसटू द्यायचे नव्हते..अदिती सारंगधरनं सांगितलं सिनेसृष्टीतल्या ब्रेकचं कारण

अवनी परांजपे, पोदार कॉलेज

महाराष्ट्र टाइम्स.कॉम

'मंजुळा' या एकांकिकेतून अभिनयक्षेत्रात दमदार पदार्पण केलेल्या अदिती सारंगधरचा चाहतावर्ग मोठा आहे. 'वादळवाट'मधली तिनं साकारलेली अॅडव्होकेट रमा चौधरीदेखील प्रेक्षकांच्या आजही लक्षात आहे. एकीकडे 'लक्ष्य'मालिकेतील धडाकेबाज इन्स्पेक्टर सलोनी तर दुसरीकडे 'अभिलाषा'मधील जानू आणि 'ह. म. बने तु. म. बने'मधील तुलिका; अशा वैविध्यपूर्ण भूमिकांमधून तिनं प्रेक्षकांची मनं जिंकली. मालिकाच नाही तर वैविध्यपूर्ण विषय असलेल्या सिनेमांमध्येही तिनं तिच्या अभिनयाची चुणूक दाखवून दिली. 'प्रपोजल' हे तिचं नाटक विशेष गाजलं. नाटक, ट्रोलिंग, मातृत्व, भूमिकानिवडीचा मंत्र अशा विविध विषयांवर तिनं मनमोकळ्या गप्पा मारल्या.

रंगभूमीवर पुनरागमन
मधल्या काळात घेतलेल्या ब्रेकनंतर पुन्हा एकदा रंगभूमीवर काम करताना दडपण होतं; कारण अनेक गणितं बदलली आहेत. पण प्रेक्षकांनी माझ्यावर पुन्हा एकदा पहिल्यासारखंच प्रेम केलं. 'चर्चा तर होणारच' हे एक डार्क ह्युमरचं नाटक आहे. त्यामुळे प्रेक्षकांना नेहमीपेक्षा काहीतरी वेगळं देण्याचा हा प्रयत्न आहे. अशा वेगळ्या आशयाच्या नाटकाला रसिकांचा चांगला प्रतिसाद मिळतोय ही आनंददायी बाब आहे.
मैं पार्टी छोड नहीं तोड रहा हू! राज्यातल्या सत्तासंघर्षाला टक्कर देणारा सिटी ऑफ ड्रिम्सचा जबरदस्त ट्रेलर
छोट्याशा भूमिकेवरही भरभरून प्रेम
'नवा गडी नवं राज्य' या मालिकेत मी नेहमीपेक्षा वेगळी भूमिका साकारली होती. त्यात माझे मोजके प्रसंग होते; पण त्यालासुद्धा प्रेक्षकांनी भरभरून प्रतिसाद दिला. भूमिका छोटी असो वा मोठी; प्रेक्षकांचं प्रेम कायम मिळत आलं आहे. ही भावना अतिशय सुखावणारी आहे.

भूमिका निवडतानाचं गणित
एखादी भूमिका निवडताना माझे काही ठरलेले निकष नाहीत. मी आजवर प्रत्येक भूमिका अंतरमनाचा कौल घेऊन निवडली आहे. एखादं पात्र मनाला कसं वाटतंय, पटतंय का, यावर ती भूमिका करायची की नाही हे मी ठरवते आणि सुदैवानं आजवर तरी हा मनाचा कौल कधीच चुकलेला नाही.
ती एक गोष्ट संशयास्पद... The Kerala Story वादावर स्पष्टच बोलले शत्रुघ्न सिन्हा
ट्रोलिंग हा प्रसिद्धीचा भाग
'वादळवाट'मधील रमा चौधरी ही कणखर भूमिका मी साकारली होती. त्यानंतर 'येऊ कशी तशी मी नांदायला' या मालिकेतील मी मालविका ही व्यक्तिरेखा वठवली; पण यावरून मला ट्रोलिंगला सामोरं जावं लागलं. मी ट्रोलर्सकडे सकारात्मकतेनं बघते. जसं कौतुक होतं, तसंच त्यातून आपल्याला आपल्या चुकासुद्धा कळतात. ट्रोलर्सनी चुकीची भाषा न वापरता, चांगल्या शब्दांत त्यांचं मत मांडणं अत्यंत गरजेचं आहे. हा प्रसिद्धीचाच एक भाग आहे.

लेखिका उलगडली
पूर्वी अनेकदा कविता, लेख मी लिहीत होते; पण कालांतरानं ते मागे पडलं. 'महाराष्ट्र टाइम्स'मुळे मला माझ्यातली लेखिका नव्यानं गवसली. तिला पुन्हा एकदा भेटायची संधी मिळाली. 'मटा' अंतर्गत 'माझं शहर माझी साधना' या सदरात लेखन करायला मिळाल्याचा आनंद आहे. यानिमित्तानं मागे पडलेल्या, राहून गेलेल्या गोष्टी पुन्हा नव्यानं सुरू करायची वेळ आली आहे याची जाणीव झाली.

मुलासाठी घेतला ब्रेक
मला मुलगा झाल्यानंतर त्याला वेळ देता यावा म्हणून मी कामापासून काही वर्षं विश्रांती घेतली होती. तो मोठा होतानाचे क्षण मला निसटू द्यायचे नव्हते. तेव्हा त्याला जास्तीत जास्त वेळ देणं मला महत्त्वाचं वाटत होतं. आता तो मोठा होतोय, तसं मीसुद्धा कामाला परत सुरुवात केली आहे. इतक्या ब्रेकनंतरसुद्धा प्रेक्षकांचं मिळणारं प्रेम आणि येणाऱ्या चांगल्या कलाकृती ही भावना सुंदर आहे.

ओटीटीवर काम करायला आवडेल
सध्या ओटीटी (ओव्हर द टॉप) हे ताकदीचं मध्यम आहे. प्रेक्षकांनासुद्धा हे माध्यम आवडतंय. त्यामुळे ओटीटी माध्यमातून प्रेक्षकांसमोर यायला मलासुद्धा नक्कीच आवडेल.