वेबसीरिज हेच भविष्य!

विनय राऊळ, कॉलेज क्लब रिपोर्टर

‘लंचबॉक्स’, ‘एअरलिफ्ट’ या सिनेमातल्या भूमिकांमुळे निमरत कौर हे नाव चर्चेत आलं. वेबसीरिजची वाढत चाललेली क्रेझ लक्षात घेता, मनोरंजनसृष्टीतलं हेच भविष्य आहे असं तिला वाटतं. 'द टेस्ट केस' या आगामी वेबसीरिजबद्दल तिनं मटाशी मारलेल्या गप्पा...

पहिली महिला कमांडो यावर प्रथमच काही वेगळी कलाकृती लोकांसमोर येतेय. त्याबद्दल काय सांगशील?

कलाकार म्हणून ही नक्कीच एक विलक्षण संधी आहे. आता मुलीसुद्धा कमांडो म्हणून सैन्यात भरती होऊ शकतात. अलीकडेच बीएसएफमध्ये पंचवीस वर्षांची पहिली महिला कमांडो दाखल झाली. ही एक सकारात्मक गोष्ट आहे.

तुझ्या आगामी वेबसीरिजमध्ये तू सैन्यदलातल्या मुलीची भूमिका साकारतेयस. काय तयारी केलीस?

या भूमिकेसाठी मी जवळपास तीन ते चार महिने खडतर प्रशिक्षण घेतलं. माझ्या आजपर्यंतच्या कोणत्याही भूमिकेसाठी मी स्वतःला एवढं प्रोत्साहित केलं नव्हतं, जेवढं या भूमिकेसाठी केलं आहे. अशी आव्हानात्मक भूमिका करताना खूपच मजा आली. अशी भूमिका करणं म्हणजे आव्हानात्मक आहे. ही भूमिका करताना आधी खूप विचारात पडले होते की मला हे जमेल की नाही. त्यातून मी स्वतःला प्रोत्साहित करून ती भूमिका साकारतेय. हा प्रवास खूप काही शिकवून जाणारा होता.

मुलींनीसुद्धा सैन्यात यायला हवं का?

महिलांनी स्वतःला कधीच कमी समजू नये. माझ्यामध्ये सगळं काही करण्याची हिंमत आहे हे त्यांनी स्वतःशी पक्कं समजून घेतलं पाहिजे. महत्त्वाची गोष्ट अशी की मी महिला आहे म्हणून मला वेगळे, विशेष हक्क मिळायला हवेत हा विचार त्यांनी डोक्यातून काढून टाकावा. स्वतःच्या क्षमतेवर विश्वास ठेवून आपली स्वप्नं पूर्ण करायला हवीत.

तुझे बाबासुद्धा सैन्यात होते. त्यांच्याकडून तुला काय शिकायला मिळालं?

बाबा सैन्यात असल्यानं मला त्यांच्याकडून खूप काही शिकायला मिळालं. त्यांनी स्वतः मेहनत घेऊन स्वतःच्या हिंमतीवर सैन्यात प्रवेश मिळवला होता. मला अजून आठवतंय की ते त्यांच्या आईसोबत सकाळी शेतात काम करायला जायचे आणि रात्री रस्त्यांवरच्या दिव्यांखाली अभ्यास करायचे. त्यांचं संपूर्ण शैक्षणिक जीवन हे स्कॉलरशिपवरच झालं. त्यामुळे त्यांचा हा संपूर्ण प्रवास लक्षात घेता माझ्यासाठी ते एक रिअल लाइफ हिरोच आहेत.

आताच्या तरुण पिढीला वेबसीरिजची खूप क्रेझ आहे. तुला हे सिनेमा, टीव्हीसाठी आव्हानात्मक वाटत नाही का?

खरं तर वेगळं आव्हानात्मक असं काही नाही. पण सध्या वेबसीरिज बघणारा प्रेक्षक हा खूप मोठ्या प्रमाणात विस्तारात चालला आहे. त्यामुळे मला असं वाटत की येत्या काळात वेबसीरिज हेच भविष्य असेल. नवीन प्रकारचा प्रेक्षकवर्ग सध्या दिसून येतोय. कलाकार, तंत्रज्ञांनासुद्धा स्वतःला सिद्ध करण्याची ही एक वेगळी संधी आहे.