बोल्डनेससाठी आव्हानाची वाट बघतेय !

Mrinmayi.Natu@timesgroup.com

इंडस्ट्रीत मराठमोळ्या राधिका आपटेचं नाव सध्या चर्चेत आहे. तिच्या बोल्डनेसबद्दल नेहमी बोललं जात असलं, तरी तिला स्वतःला मात्र आपण बोल्ड असल्याचं बिलकूल वाटत नाही. ‘बोल्डनेस म्हणजे धाडसीपणा. तो दाखवण्यासाठी मी आव्हानाची वाट बघतेय’, असं तिनं मुंटाशी बोलताना सांगितलं.

थिएटर, टीव्ही, लघुपट, बॉलिवूड अशा सर्वच माध्यमांमध्ये राधिका चमकतेय. बॉलिवूडच्या टिपिकल हिरोइनचा साच्यात स्वतःला न बसवता तिनं स्वतःचं वेगळं अस्तित्व निर्माण केलं. आगामी 'फोबिया'च्या प्रमोशननिमित्त तिनं ‘मुंटा’शी मनमोकळ्या गप्पा मारल्या.

थलैवाशी मराठीत गप्पागोष्टी

आगामी 'कबाली' चित्रपटात ती दक्षिणेचा सुपरस्टार रजनीकांतसोबत दिसणार आहे. या दोन्ही स्टार्समधला दुवा म्हणजे मराठी भाषा. त्यांच्यातला पहिला संवाद झाला तो मराठीतच. ‘तुम्ही खरंच मराठी बोलता का?’ असं राधिकानं जेव्हा थलैवाला विचारलं तेव्हा लगेच त्यांनी, 'हो हो, मी बेळगावचा गं, मला मराठी येतं' असं म्हणतच संभाषणाला सुरूवात केल्याची आठवण ती सांगते. आगामी 'कबाली'निमित्त माझी रजनीसरांशी चांगली मैत्री झालीय. शूटिंगलासुद्धा शॉट्सच्या मध्ये रोज बसून आम्ही वेगवेगळ्या विषयांवर मराठीत गप्पा मारायचो. त्यांच्याकडून साधेपणा शिकण्यासारखा आहे.

बोल्ड नव्हे कम्फर्टेबल

मला गर्ली दिसायला आवडत नाही. मला मुलांसारखं राहायला आवडतं. मी सिंड्रेला झोनमध्ये मोडत नाही. त्यामुळे अनेकांना मी बोल्ड वाटते. पण बोल्डनेस म्हणजे काय? तर धाडस करणं. पण मी आजवर असं काहीच केलेलं नाही ज्यासाठी धाडस दाखवावं लागलं. आजवर मी जे करत आलेय ते माझ्या कम्फर्ट झोनमध्येच. त्यामुळे मी बोल्ड काम करतेय असं म्हणणाऱ्यांकडे मी दुर्लक्ष करते.

बाबांची मदत झाली

फोबियाचं शूटिंग २८ दिवसांत झाल्यानं माझं खूप धावपळीचं शेड्यूल होतं. त्यातही माझी भूमिका अशी होती की मी भीतीशी लढा देताना दिसले. पडद्यावर मला पॅनिक अटॅक आल्याचं दाखवायचं होतं. त्यासाठी मी माझ्या श्वासोच्छ्वासावर खूप काम केलं. माझे बाबा न्यूरोसर्जन असल्यानं त्यांची या भूमिकेसाठी तयारी करताना मदत झाली.