विराटच्या इन्स्टाग्रामचा डीपी पाहिला का?

मटा ऑनलाइन वृत्त । नवी दिल्ली

भारतीय क्रिकेट संघाचा कर्णधार विराट कोहली आणि अभिनेत्री अनुष्का शर्मा यांच्या 'तेरे मेरे प्यार के किस्से..." जगजाहीर असले तरी दोघांनीही आपल्या प्रेमाची कबुली सार्वजनिकरित्या दिली नाही. क्रिकेटचे मैदान असो की बॉलिवूडमधील पार्टी विराट आणि अनुष्का एकत्र दिसतात. आता मात्र विराटने अनुष्कासोबतचा फोटो आपल्या इन्स्टाग्रामचा डीपी म्हणून ठेवला आहे. विराटच्या डीपीमुळे त्याने अनुष्का सोबतच्या नात्याची जाहीर कबुली दिली आहे.

काही दिवसांपूर्वीच विराटला भेटण्यासाठी अनुष्का बेंगळुरूत आली होती. आयपीएलमधील बेंगळुरू संघाचा कर्णधार असलेल्या विराट खांद्याच्या दुखापतीमुळे काही सामने खेळणार नाही. त्यामुळेच अनुष्काची ही भेट विराटच्या काळजीपोटी असल्याची चर्चा होती.

अर्थात अनुष्का सोबतचा फोटो सोशल मीडियावर शेअर करण्याची विराटची ही पहिली वेळ नाही. याआधी 'व्हॅलेंटाइन डे'ला विराटने अनुष्का सोबतचा एक फोटो शेअर केला होता. त्या फोटोखाली विराटने तु माझ्या सोबत असशील तर प्रत्येक दिवस व्हॅलेंटाइन्स डे असेल, अशी कॅप्शन लिहली होती. त्यानंतर आंतरराष्ट्रीय महिला दिना निमित्ताने आपली आई आणि अनुष्काचा एकत्र फोटो शेअर करत या दोघी आपल्या आयुष्यातील सर्वात महत्त्वाच्या महिला असल्याचे विराटने नमुद केले होते.

गेल्यावर्षी विराट-अनुष्का उत्तराखंडमध्ये सुट्ट्यांसाठी गेले होते. तेव्हा त्यांचा साखरपुडा झाल्याचे वृत्त देखील आले होते. मात्र विराटने त्या वृत्ताचे खंडन केले होते. २०१७ हे वर्ष दोघांसाठी छान गेले आहे. अनुष्काच्या 'फिल्लौरी' चित्रपटाला चांगले यश मिळाले आहे. तर विराटची मैदानावरील कामगिरी सर्वोत्तम झाली आहे. तसेच त्याचा पद्मश्रीने सन्मान करण्यात आला आहे.