…फक्त तुरुंगात जाऊ नकोस!

इंटरनेट हे मुक्त माध्यम असले तरी त्यावरील आशयामुळे अनेकदा कंटेंट क्रिएटर्स कायद्याच्या कचाट्यात अडकले आहे. एआयबीचा तन्मय भट्ट अशाच काही वादग्रस्त युट्यूब स्टार्सपैकी एक आहे.

तन्मय आणि वाद हे समीकरण पाहून तन्मयच्या आईनेच त्याला ‘बाबा, तू काहीही कर, पण फक्त तुरुंगात जाऊ नकोस’ या शब्दांत त्याच्याकडे विनवणी केली आहे. खुद्द तन्मयनेच हे मुंटाशी बोलताना कबूल केलं. ‘टोटल व्हायरल फिव्हर’ या लोकप्रिय युट्यूब चॅनलचा संस्थापक अनुरभ कुमारच्या विरोधात एफआयआर दाखल झाला आहे. काही आठवड्यांपासून अनुरभविरोधात वेगवेगळे आरोप लावले जात होते. याचसंदर्भात युट्यूबच्या मंचावर तन्मयला प्रश्न विचारला असता, नेहमीप्रमाणे त्याने त्याच्या हलक्याफुलक्या स्टाइलमध्ये घरचं हे गुपित सांगून टाकलं. अनुरभ प्रकरणाबद्दल काही बोलण्यास नकार देताना तन्मयने ‘मी याबद्दल काहीच बोलू इच्छित नाही. कारण मी अनेक प्रकरणांमध्ये असं बोलून अडकलो आहे. माझ्यावर आधीच सोळा एफआयआर आहेत’ असं तो म्हणाला.

‘तुझ्या घरचं वातावरण कसं आहे? तुझे आई-बाबा तुला पाठिंबा देतात का?’ या प्रश्नाचं उत्तर देताना तन्मय म्हणाला की ‘मला आई-बाबांनी खूप मोकळीक दिली आहे. मी पत्रकारिता, जाहिरात, दिग्दर्शन आणि आता युट्यूब असा भन्नाट प्रवास केला आहे. पण माझी आई मला करिअरबद्दल बोलताना एक गोष्ट नक्की सांगते, तू काही पण कर, फक्त तुरुंगात जाऊ नकोस’ असे तो हसत सांगतो. तन्मय भट यापूर्वी रोस्टर, स्नॅपचॅट प्रकरणात अडकला होता.

मुक्तपणे लिहिता यावं

‘काही वादांमध्ये अडकल्यानंतरही आम्ही मुक्तपणे लिहितो’ असं तन्मय सांगतो. ‘जे काही तुमच्या मनात येईल ते लिहा, असं आम्ही आमच्या लेखकांना असं सांगतो. कोणताही संकोच मनात ठेऊ नका. ज्या दिवशी आम्ही परिस्थितीचा विचार करून जपून लिहायला सुरुवात करु तिथेच आमची सर्जनशीलता संपली असं समजावं. इंटरनेटसारख्या खुल्या माध्यमावर मोकळेपणाने व्यक्त होता येणं गरजेचं आहे. लोकांच्या टिकेचा आम्ही विचार करत नाही. तसा केला तर आम्ही नीट व्यक्त होत नसल्याने आमचं काम योग्य पद्धतीने करत नाहीय असा त्याच अर्थ होत असल्याचं तन्मयचं म्हणणं आहे.