मेघनानं केलं स्पीलबर्गसाठी अॅनिमेशन

फिल्म अॅनिमेशन हे क्षेत्र करिअर म्हणून निवडणाऱ्या मुलींची संख्या कमी असताना पुण्याच्या मेघना गुप्तेनं थेट प्रख्यात दिग्दर्शक स्टीव्हन स्पीलबर्ग यांच्या सिनेमासाठी काम केलंय. सध्या न्यूझीलंड इथं वास्तव्यास असणाऱ्या मेघनानं स्पीलबर्ग यांच्या ‘द बीएफजी ः बिग फ्रेंडली जाएंट’ या सिनेमामधील बऱ्याच शॉट्सचं अॅनिमेशन केलं आहे. या कामासाठी मेघनानं खुद्द स्पीलबर्ग यांच्याकडून शाबासकी मिळवली असून, सिनेमाच्या श्रेयनामावलीमध्येही तिच्या नावाचा समावेश करण्यात आला आहे. या अॅनिमेशनपटाला सुपरस्टार अमिताभ बच्चन यांनी आवाज दिलाय.
मेघना मूळची पुण्याची. सीओईपीमधून आयटीमध्ये पदवी मिळवल्यानंतर ती सॉफ्टवेअर इंजीनिअर म्हणून काम करू लागली. चित्रकलेवरील प्रेमामुळे तिचं मन त्या नोकरीत रमलं नाही; म्हणून चांगल्या पगाराची नोकरी सोडून सॅनफ्रॅन्सिस्को इथल्या ‘अॅकॅडमी ऑफ आर्ट युनिव्हर्सिटी’तून थ्री डी अॅनिमेशनमध्ये तिनं मास्टर्स केलं. ‘कार्टून्स हा माझ्या जिव्हाळ्याचा विषय. ते बनतात कसे, त्याचं तंत्र काय, याविषयी मला कुतूहल वाटायचं. अखेर या उत्सुकतेपोटी मी थ्रीडी अॅनिमेशन करण्याचा निर्णय घेतला,’ असं मेघनानं सांगितलं.
पदवी घेतल्यानंतर मेघनानं लॉस एंजेलिस इथं ‘ऱ्हिदम अँड ह्यूज स्टुडिओ’ तसंच सिंगापूरला ‘आयएलएम’ या व्हीएफएक्स कंपनीत नोकरी केली. दरम्यान तिनं ‘अल्विन अँड चिपमंक्स ३ चिपरेक्ड’ अशा सिनेमांसाठी अॅनिमेटर म्हणून काम केलं. सध्या ती ‘विटा डिजिटल’ या न्यूझीलंडच्या कंपनीत काम करत असून, ‘अल्विन अँड चिपमंक्स ४ रोडचिप्ड’, ‘द ग्रेट वॉल’ आणि ‘द बीएफजी’ या सिनेमांतील काही शॉट्सचं तिनं वैयक्तिक अॅनिमेशन केलंय. ‘द बीएफजी’नंतर मेघनानं ‘वॉर फॉर द प्लॅनेट ऑफ द एप्स’ या मोठ्या सिनेमाच्या सीक्वेलवर काम सुरू केलंय. या सिनेमाच्या पहिल्या भागाला प्रख्यात अशा ‘अॅकॅडमी अॅवॉर्ड’चं नामांकन मिळालंय.
लबर्ग यांच्या सिनेमात काम करण्याची संधी मिळाल्यानं करिअरला वेगळी दिशा मिळाल्याचं ती सांगते. अॅनिमेशनमध्ये भारतात मुली कमी प्रमाणात दिसतात. परदेशात काय चित्र आहे, याबाबत मेघना सांगते, की हो, हे खरं आहे. या क्षेत्रात पुरुष कलाकारांची मक्तेदारी आहे. भारतातच नाही, तर परदेशातही यात मुली हाताच्या बोटावर मोजण्याइतक्या आहेत. अॅनिमेशनपटाला आपल्याकडे अजूनही लहान मुलांचे सिनेमे समजलं जातं. परदेशात मात्र अॅनिमेशनपट सगळ्या वयोगटांतील प्रेक्षक आवर्जून पाहातात. अशा सिनेमांमधून एखादा चांगला संदेश प्रभावीपणे प्रेक्षकांपर्यंत पोहोचवला जातो.

चौकट
तो मेल जपून ठेवलाय
सिनेमाच्या प्रक्रियेदरम्यान स्पीलबर्ग यांनी मेघनाशी व्हिडिओ कॉन्फरन्सिंगद्वारे संवाद साधला असून, तिनं दिलेल्या शॉट्सचं त्यांनी कौतुक केलंय. ‘स्टिव्हन लव्हड यूवर शॉट्स,’ अशा आशयाचा सुपरव्हायझरनं पाठवलेला ई-मेल तिनं मेलबॉक्समध्ये जपून ठेवलाय.