'तुझ्याकडून ही अपेक्षा नव्हती' ग्लॅमरस फोटो शेअर करणाऱ्या प्रियांका चोप्राला नेटकऱ्यांनी सुनावलं

मुंबई: ग्लोबल स्टार आणि बॉलिवूडची देसी गर्ल प्रियांका चोप्रा सध्या तिच्या कुटुंबासोबत न्यूयॉर्कमध्ये आहे. पण भारतात वाढलेल्या करोना संक्रमणाबाबत तिनं काळजी व्यक्त केली आहे. एवढंच नाही तर आपल्या देशाच्या मदतीसाठी ती सध्या फंड जमवत आहे. काही दिवसांपूर्वीच तिनं एक व्हिडीओ शेअर करत भारताच्या मदतीचं आवाहन केलं होतं. पण नुकत्याच शेअर केलेल्या एका फोटोमुळे प्रियांका सोशल मीडियावर नेटकऱ्यांनी सुनावलं आहे. सोशल मीडियावर ग्लॅमरस फोटो शेअर करणं प्रियांकाला महागात पडलं आहे.

प्रियांकानं स्वतःचा फोटो इन्स्टाग्रामवर शेअर करत ती आणि निक आता मॅक्स फॅक्टर ब्रँडचे ग्लोबल अँबेसिडर झाल्याची माहिती दिली. आता दोघं मिळून हा मेकअप ब्रँड प्रमोट करणार आहेत. ही माहिती देताना प्रियांकानं व्हाइट ड्रेसमधील फोटो शेअर केला आहे. ज्यात तिनं गडद रेड लिपस्टिक लावली आणि मेस्सी हेअरस्टाइल केली आहे. या फोटोमध्ये प्रियांका खुपच ग्लॅमरस दिसत आहे.


प्रियांकाच्या या फोटोवर कमेंट करताना अनेक युझर्सनी तिला शुभेच्छा देत तिचं कौतुक केलं आहे. मात्र काही युझर्सना करोनाच्या काळात देश गंभीर परिस्थितीशी सामना करत असताना प्रियांकाचं असा फोटो शेअर करणं अजिबात आवडलेलं नाही आणि त्यांनी तिला यावरून चांगलंच सुनावलं आहे. एका युझरनं लिहिलं, 'इथे लोक रोज मरत आहेत आणि तू फोटो क्लिक करून एन्जॉय करत आहे. खरंच तुझ्याकडून ही अपेक्षा नव्हती.' तर आणखी एका युझरनं कमेंट केली, 'भारत मरत आहे.'


दरम्यान करोनाच्या काळात प्रियांका चोप्रा आणि तिचा पती निक जोनस एका एनजीओच्या माध्यमातून भारतीयांची मदत करत आहेत. एक व्हिडीओ शेअर करत ही मदत कशाप्रकारे केली जाऊ शकते हे त्यांनी काही दिवसांपूर्वीच सांगितलं होतं. या व्हिडीओमध्ये प्रियांका म्हणाली, 'मी आणि निकने आमच्याकडून योगदान दिलं आहे. आम्ही पाहिलं आहे की, हा व्हायरस किती वेगाने पसरत आहे. आपण सर्वजण सुरक्षित होत नाही तोपर्यंत कोणीच सुरक्षित नाही. हे पाहून समाधान मिळत आहे की, लोक एकमेकांची मदत करण्यासाठी पुढे येत आहेत. आपल्याला सर्वांना एकत्र येऊन लढायला हवं.'


प्रियांकाच्या वर्कफ्रंट बद्दल बोलायचं तर ती शेवटची 'द व्हाइट टायगर' या चित्रपटात दिसली होती. ज्यात प्रियांकासोबत राजकुमार राव आणि आदर्श गौरव यांच्या मुख्य भूमिका होत्या. हा चित्रपट ओटीटी प्लॅटफॉर्म नेटफ्लिक्सवर रिलीज झाला होता. प्रियांकाच्या या चित्रपटाला ऑस्करचं नामांकनही मिळालं होतं. तसेच प्रेक्षकांचाही या चित्रपटाला उत्तम प्रतिसाद मिळाला होता.