पुन्हा सुरु होणार 'पवित्र रिश्ता', कोण घेणार सुशांतची जागा?

मुंबई- छोट्या पडद्यावर अशा अनेक मालिका आहेत ज्यांनी प्रेक्षकांच्या मनावर वर्षानुवर्षे राज्य केलं. मालिका संपल्यावरही त्या मालिकांची जादू प्रेक्षकांवर कायम राहिली. अजूनही प्रेक्षक त्या मालिका विसरू शकले नाहीत. अशा मालिकांमध्ये समावेश होतो तो म्हणजे 'पवित्र रिश्ता' या अविस्मरणीय मालिकेचा. या मालिकेने चित्रपटसृष्टीला दोन मोठे कलाकार दिले. सुशांत सिंह राजपूत आणि अंकिता लोखंडे यांनी मालिकेतील आपल्या दमदार अभिनयाने प्रेक्षकांची मने जिंकली आणि ही जोडी चाहत्यांची आवडती जोडी ठरली .

२००९ ला प्रदर्शित झालेल्या या मालिकेला प्रेक्षकांनी अक्षरशः डोक्यावर घेतलं. या मालिकेने अंकिता व सुशांत दोघांनाही अभिनय क्षेत्रात एक वेगळी ओळख मिळवून दिली. आता मालिकेच्या निर्मात्यांनी पुन्हा एकदा मालिका प्रेक्षकांसमोर आणायचा निर्णय घेतलाय. या मालिकेचा नवा सिजन लवकरच प्रेक्षकांच्या भेटीला येणार आहे. छोट्या पडद्यावरील 'पवित्र रिश्ता' चा दुसरा भाग आता ओटीटी प्लॅटफार्मवर प्रदर्शित होणार आहे. मालिका अल्ट बालाजीवर प्रदर्शित होणार असून ओटीटी प्लॅटफॉर्मवर प्रदर्शित होणारी ही पहिलीचं मालिका असणार आहे.


'पवित्र रिश्ता' चे दिग्दर्शक कुशाल जावेरी यांनी आपल्या मुलाखतीत म्हटले, 'या मालिकेच्या मुख्य अभिनेत्रीची भूमिका पुन्हा एकदा अंकिता लोखंडे साकारणार असून तिने तसा करारदेखील केला आहे. मी खूप आनंदी आहे की, ही मालिका पुन्हा नव्याने प्रेक्षकांच्या भेटीला येत आहे कारण आजही ही मालिका प्रेक्षकांच्या हृदयाच्या जवळ आहे.' कुशाल या मालिकेचे दिग्दर्शन करणार नसले तरीही ते मालिकेसोबत जोडलेले राहणार आहेत. परंतु, सुशांतच्या मृत्यूनंतर मालिकेतील त्याची जागा कोण घेणार हे अजूनही गुलदस्त्यातच आहे.