Video- २० वर्षांनंतर भेटले नीलम आणि गोविंदा, 'आपके आ जाने से' गाण्यावर केला धम्माल डान्स

मुंबई : सोनी टीव्हीवरून प्रसारित होणाऱ्या 'सुपर डान्सर ४' कार्यक्रमात या आठवड्याला अभिनेता गोविंदा आणि अभिनेत्री नीलम कोठारी पाहुणे म्हणून सहभागी होणार आहेत. कार्यक्रमाचा प्रोमो सोशल मीडियावर चांगलाच व्हायरल झाला आहे. प्रोमोमध्ये या दोघांवर चित्रीत झालेल्या 'आप के आ जाने से' गाण्यावर जबरदस्त डान्स सादर केला. कार्यक्रमाच्या निमित्ताने तब्बल २० वर्षांनंतर दोघं एकत्र आले आणि त्यांनी स्टेज शेअर केला.

या दोघांचा डान्स पाहून कार्यक्रमाचे परीक्षक शिल्पा शेट्टी, अनुराग बासू, गीता कपूर यांनी त्यांना भरभरून दाद दिली. दरम्यान, कार्यक्रमातील स्पर्धकही त्यांच्यावर चित्रीत केलेल्या गाण्यांवर डान्स सादर करणार आहेत. कार्यक्रमाचा प्रोमो नीलमचा नवरा आणि अभिनेता समीर सोनी याने इन्स्टाग्राम अकाउंटवर शेअर केला आहे. हा व्हिडी ओ शेअर करताना त्याने लिहिले की, '..आणि अखेर २० वर्षांची प्रतीक्षा संपली...'


८० आणि ९० च्या दशकामध्ये गोविंदा आणि नीलम यांची जोडी कमालीची हिट होती. दोघांनी १४ सिनेमांमध्ये एकत्र काम केले होते. त्यामध्ये घराना, खुदगर्ज, सिंदूर, हत्या, लव ८६, दो कैदी, इल्जाम, फर्ज की जंग, बिल्लू बादशाह, ताकतवर, घर में राम गली में श्याम, दोस्त गरीबों का यांसारख्या सिनेमांचा समावेश आहे.

'सुपर डान्सर ४' या कार्यक्रमाच्या स्टेजवर गोविंदा आणि नीलम यांनी ग्रँड एंट्री घेतलेली प्रोमोमध्ये दिसत आहे. या स्टार जोडीचं कार्यक्रमातील स्पर्धक आणि परीक्षकांनीही जोरदार स्वागत केलं. त्यानंतर या दोघांनी एकत्र डान्स केला.