'शांतीत क्रांती' मधून शिखा तनसालियाचं मराठीत पदार्पण

मुंबई: काही वर्षांपासून बॉलिवूडमधल्या कलाकारांना मराठी चित्रपटांचं आकर्षण वाटू लागलं आहे. अनेक कलाकार मराठी चित्रपटात काम करण्याची इच्छा व्यक्त करु लागले आहेत. त्यानुसार येत्या काळात अनेक हिंदी कलाकार मराठी चित्रपटात दिसण्याची शक्यता नाकारता येत नाही. यासह त्यांना मराठी वेबविश्वदेखील खुणावू लागलं आहे.


अलीकडे 'शांतीत क्रांती' या मराठी सीरिजचा ट्रेलर प्रदर्शित झाला. त्यात अभिनेत्री शिखा तनसालियाची झलक दिसली. ते बघून प्रेक्षकांना आश्चर्याचा धक्का बसला. या सीरिजमध्ये ललित प्रभाकर, अभय महाजन आणि अलोक राजवाडे प्रमुख भूमिकेत आहेत. या तिघांमधील मैत्रीच्या भवती सीरिजचं कथानक फिरतं.



यात शिखा योग प्रशिक्षकाची भूमिका पार पाडणार आहे. ती कमीत कमी वेळेत मराठी शिकली आहे. त्या संपूर्ण अनुभवाबद्दल शिखा सांगते की, 'मराठी शिकणं आव्हानात्मक होतं. पण सीरिजचा लेखक चेतनची खूप मदत झाली. त्यानं मला खूप काही शिकवलं. तसंच संपूर्ण टीम माझ्या मदतीला तत्पर होती'. आता ही कलाकार मंडळी सीरिजमध्ये काय धमाल करतात हे पाहण्यासारखं असेल.