पाऊस आणि वाफाळतं सूप

पावसाळा सुरु झाला की, काहीतरी गरमागरम खाण्याच्या इच्छेला आवर घालता येत नाही. मग कुरकुरीत कांदाभजी किंवा खरपूस भाजलेला भुट्टा खाऊन जीभेचे चोचले पुरवले जातात. त्याचप्रमाणे अशा मौसमात चवदार सूप पिण्याची मज्जा काही निराळीच असते. तोंडाला पाणी सुटेल अशा चमचमीत सूप्सच्या रेसिपीज

1. व्हेज सूप
साहित्य- 2 चमचे ऑलिव्हचं तेल, 6 लसणाच्या पाकळ्या, बारिक कापलेले दोन कांदे, थोडी बारिक चिरलेली कांद्याची पात, चौकोनी तुकडे केलेले गाजर आणि सिमला मिरची, उभ्या चिरलेल्या मिरच्या, पाच कप पाणी, चवीनुसार मीठ, थोडासा सोया सॉस
कृती- सर्वात प्रथम एका भांड्याच तेल घेऊन त्याच लसूण पाकळ्या घालून तडतडू द्या. त्यात कांदा तांबूस होईपर्यंत परतून घ्या. त्यानंतर त्यात बाकी सर्व भाज्या आणि पाणी घालून भाज्या उकडू द्या. मिश्रण तीस मिनिटं ढवळा. शेवटी त्यात चवीनुसार मीठ आणि सोया सॉस घाला. अशाप्रकारे तुमचं सूप तयार आहे.

2. मशरूम क्रिम सूप
साहित्य- 600 ग्रॅम मशरुम, 2 चमचे आलिव्हचं तेल, एका कांदा चिरलेला, 3 लसणाच्या पाकळ्या, साधारण एक लीटर व्हेजिटेबल स्टॉक, मीठ, काळिमीरी पूड, 50 मिली फ्रेश क्रिम
कृती- मशरुमची लहान तुकडे करुन ठेवा. मध्यम आचेवर एका भांड्यात तेल गरम करायला ठेवा. त्यामध्ये कांदा, लसणाच्या पाकळ्या आणि मशरुम घाला. त्यानंतर त्यामध्ये व्हेजिटेबल स्टॉक घालून एक उकळी आणा. साधारण 15 मिनिटं हे मिश्रण ढवळल्यानंतर त्यात काळीमिकरी आणि मीठ घाला. सगळ्यात शेवटी क्रिम घालून सूप उकळवा आणि तुमचं सूप सर्व्हसाठी तयार आहे.

3. गॅझपाचो सूप
साहित्य- 4 टोमॅटो, 1 लहान काकडी, 1 लाल भोपळी मिरची, 1 कांदा, 1 कप टोमॅटोचा तयार रस, पाव कप व्हिनेगर, 2 लसूण पाकळ्या बारिक चिरलेल्या, 1 चमचा लिंबाचा रस, मीठ,
कृती- टोमॅटो, काकडी, लाल भोपळा मिरची, कांदा, लसूण हे एकत्र मिक्सरमध्ये वाटून घ्या. या मिश्रणात लिंबू रस आणि मीठ घालून घ्या. यामध्ये थोडसं पाणी घालून बारिक आचेवर गरम करा आणि सर्व्ह करा.

4. भोप‍ळा आणि रताळ्याचे सूप
साहित्य- ऑलिव्हचं तेल, 1 कांदा बारिक चिरलेला, 1 चमचा खिसलेलं आलं, 500 ग्रॅम बारिक चिरलेला भोपळा, 250 ग्रॅम बारिक चिरलेलं रताळे, 1 चमचा जीरे पूड, 5 कप व्हेजिटेबल स्टॉक, मीठ, काळीमिरी पूड, 1 चमचा खोबरं, 1 मिरची बारिक चिरलेली.
कृती- मध्यम आचेवर आलिव्हचं तेल गरम करत ठेवा. त्यामध्ये जीरं, कांदा आणि आलं घालून परतून घ्या. त्यानंतर त्यामध्ये भोपळा आणि रताळ्याचे तुकडे घाला आणि मिश्रण ढवळा. या मिश्रणात व्हेजिटेबल स्टॉक घाला. हे मिश्रण थंड करुन मिक्सरमध्ये वाटून घ्या. ते परत कमी आचेवर ठेवून त्यामध्ये मीठ, काळीमिरी पूड, मिरची, खोबरं घालून ढवळा.

5. ब्रोकली सूप
साहित्य- 4 चमचे तेल, बारिक चिरलेले दोन कांदे, 1 बारिक चिरलेली लाल मिरची, 2 हिरव्या मिरच्या, 1 चमचा आलं-लसूण पेस्ट, अर्धा किलो ब्रोकली, बारिक चिरलेले दोन टोमॅटो, 2 बटाटे, नारळाचं दूध, मीठ, काळीमिरी आणि एक चमचा लिंबाचा रस
कृती- एका भांड्यात तेल गरम करुन कांदा, लाल मिरची, हिरव्या मिरची आणि आलं-लसूण पेस्ट घाला. हे सर्व तांबूस होईपर्यंत परतवून घ्या. यामध्ये ब्रोकली घालून तेलात भाजून घ्या. यामध्ये टोमॅटो, बटाट्याचे तुकडे घालून परतवून घ्या. त्यामध्ये नारळाचं दूध, मीठ, काळीमिरी आणि पाणी घालून हे मिश्रण ढवळा. शेवटी यामध्ये पाणी घालून हे सूप सर्व्ह करा.