चपातीच्या चटपटीत तऱ्हा

'आई दररोज काय गं पोळीभाजी देतेस? काही तरी वेगळं बनवून दे ना', असा सूर बऱ्याच घरात असतो. तसंच शिळ्या चपात्यांचं काय करायचं? ही चिंता आईला असते. पण चपत्यांबरोबर थोटे चटकदार प्रयोग करुन काही पदार्थ बनवले तर बच्चेकंपनी त्या पदार्थांवर आनंदाने ताव मारतील. तर अशाच रेसीपिज खास तुमच्यासाठी...

चपाती नूडल्स

सर्वप्रथम ४ चपात्या एकावर एक ठेवून रोल करुन घ्याव्या आणि त्याचे आडवे काप करावेत. कढईमध्ये ४ चमचे तेल गरम करुन त्यामध्ये १ चमचा आलं-लसूण पेस्ट, एक वाटी चिरलेला कोबी, प्रत्येकी अर्धी वाटी सिमला मिरची, पातीचा कांदा आणि किसलेला गाजर टाकून ७-८ मिनीटे वाफेवर शिजू द्यावं. नंतर त्यात प्रत्येकी १ चमचा सोया सॉस, चिली सॉस, लिंबाचा रस आणि ४ चमचे शेझवान सॉस घालावा. चपातीचे काप टाकून ते मिश्रण ५ मिनिटं परतावं आणि खाण्यासाठी सर्व्ह करावं.

चीझी मसाला ट्रँगल्स

एका बाऊलमध्ये १ वाटी चीझ, प्रत्येकी २ चमचे कोबी आणि बीट, एक बारीक चिरलेली हिरवी मिरची, १ मध्यम आकाराचा बारीक चिरलेला कांदा, १ चमचा चिलीफ्लेक्स, १/४ चमचा काळीमिरी पूड आणि चवीनुसार मीठ टाकून मिश्रण एकजीव करुन घ्यावं. पोळीचे २ भाग करुन घ्यावेत आणि त्याच्या २ बाजूच्या एकत्र करुन टूथपिकने जोडून घ्याव्यात. आतील बाजूला टोमॅटो सॉस लावून त्यावर वरील मिश्रण भरावं. पॅनवर १ चमचा बटर टाकून दोन्ही बाजूंनी खरपूस भाजून घ्यावं आणि सर्व्ह करावं.

चपाती कटलेट्स

४-५ चपात्या मिक्सरमध्ये बारीक करुन घ्याव्या. एका बाऊलमध्ये चपात्यांचा चुरा, १/२ वाटी बारीक चिरलेली कोथिंबीर, २ चमचे लालतिखट, १ चमचा आलं-लसूण पेस्ट, २ बारीक चिरलेल्या हिरव्या मिरच्या, १/२ वाटी कांदा, चवीनुसार मीठ आणि चाट मसाला, आमचूर पावडर, १ वाटी मोड आलेले मूग, ४ चमचे ओट्स आणि गरजेनुसार पाणी घालून मिश्रण एकजीव करुन घ्यावं. एका वाटीमध्ये ४ चमचे मैदा आणि १/२ वाटी पाणी घेऊन पेस्ट बनवावी. मिश्रणाचे गोळे बनवून मैद्यात बुडवून नंतर ब्रेडक्रम्समध्ये घोळवून कढईमध्ये शॅलो फ्राय करुन घ्यावेत.
संकलन - पूजा जाधव,
कॉलेज क्लब रिपोर्टर