वरण-भाताचे स्वादिष्ट पराठे

तुमच्या फ्रीजमध्ये जर वरण-भात शिल्लक राहिला असेल तर तुम्ही त्याचे पराठे बनवू शकता. वरण-भाताचे पराठे अतिशय स्वादिष्ट बनतात. पराठे बनविण्यासाठी मूग, तूर किंवा चने असे कोणत्याही डाळीचे वरण बनविलेले असले तरी चालेल. चला तर पाहूया, वरण-भाताच्या पराठ्यांची स्वादिष्ट रेसिपी...

साहित्य:
१ वाटी वरण, १ वाटी भात, दोन वाटी गव्हाचे पीठ, चवीनुसार मीठ, अर्धा चमचे जिरे, तेल किंवा तूप

कृती:
१. एका भांड्यात गव्हाचे पीठ घेऊन त्यात मीठ, जिरे आणि एक छोटा चमचा तेल घाला.
२. नंतर त्यात राहिलेला वरण-भात घालून मिश्रण चांगले एकजीव करून घ्या.
३. आवश्यकतेनुसार पाणी घालून पीठ चांगले मळून घ्या.
४. मळलेले पीठ २० मिनिटे झाकून ठेवा म्हणजे ते चांगले मुरेल.
५. पीठाचे एक समान गोळे करून एकेका गोळ्याची पोळी लाटून घ्या.
६. दुसऱ्या बाजूला तवा गरम करून त्यावर थोडे तेल किंवा तूप घालून एकेक पराठा चांगला शेकून घ्या.
७. पराठे शेकताना प्रथम मध्यम आचेवर हलक्या सोनेरी रंगात शेकून घ्या
८. मग गॅस मंद करून दोन्ही बाजूंनी नीट शेकून घ्या.
९. दही, लोणचे किंवा कोणत्याही चटणीसोबत गरम गरम वरण-भाताचे पराठे सर्व्ह करा.