आंबा पिकतो...

मे- एप्रिल महिन्यात फळांचा राजा म्हणजे आंब्याचं आगमन झालं की, पंगतीत कोण जास्त आंबे खाणार यावर पैजा लागतात. त्याशिवाय मीठ आणि तिखट लावून मिटक्या मारत कैरी खाण्याची मज्जा काही औरच असते. तर अशाच काही आंब्याच्या हटके रेसिपीज तुमच्यासाठी...

आंबा-बदाम स्मुदी साहित्य- ३ आंबे, वेलची पावडर, १०-१५ बदाम, साखर, बर्फाचे खडे, पुदीन्याची पानं कृती- * दोन आंब्यांचे रस काढा आणि एक आंब्यांच्या फोडी करा. * आमरस, वेलची पावडर, बदाम, साखर आणि बर्फाचे तुकडे एकत्र मिक्स करा आणि मिक्सरमध्ये घालून एकजीव करा. * मोठ्या ग्लासमध्ये हे मिश्रण घाला आणि आंब्याची फोड, पुदिन्याची पानं घालून स्मुदी सर्व्ह करा

आंबा रायता साहित्य- * ओलं खोबरं, लाल सुकी मिरची, मोहरी, मीठ, आमरस (कोयीसकट) कृती- * प्रथम ओलं खोबरं, लाल सुकी मिरची आणि कच्ची मोहरी वाटून घ्यावी. * त्यानंतर आमरस काढून त्यात कोय तशीच ठेवावी. * वरील वाटण आमरसामध्ये घालून मिश्रण एकत्र करावं.

फजेतो साहित्य- १/४ कप आमरस, १ कप दही, १ टेबल स्पून बेसन, १ टेबल स्पून आलं आणि हिरव्या मिरचीची पेस्ट, १ चमचा हळद, १ चमचा गूळ, २ कप पाणी, २ दालचिनीच्या काड्या, २-३ लवंग, १/४ आलं पावडर, १ चमचा तेल, ३/४ चमचा मोहरी, १/४ चमचा जीरं, २-३ छोट्या गोलाकार लाल मिरच्या, १/४ चमचा हिंग, ६-८ कडिपत्त्याची पानं कृती- * दालचिनी, लवंग, आल्याची पावडर हे एकत्र खलबत्त्याने वाटा. * दुसरीकडे भांड्यात तेल गरम करुन त्यात जीरं आणि मोहरीची फोडणी करा. * फोडणी तडतडायला लागल्यावर त्यात छोट्या लाल मिरच्या, हिंग, कडीपत्त्याची पानं आणि खलबत्त्यातील मसाला २ मिनिट कमी आचेवर गरम करा. * वरील मिश्रणामध्ये दही, आमरस एकत्र करुन १०-१५ मिनिटं मोठ्या आचेवर उकळा. दरम्यान मिश्रण ढवळत राहा. * तुमचा फजेतो तयार असून पोळीसोबत सर्व्ह करा.