मँगो मूड्स

आंब्याचा मोसम सुरु झाला की, प्रत्येकाच्या घरी आमरस, पन्ह, आंब्याचा शिरा, आम्बोश्या हे पदार्थ हमखास होतातचं. पण या आंब्याच्या मोसमात नेहमीपेक्षा जरा वेगळ्या रेसिपीज खास तुमच्यासाठी...

कैरी चिकन रस्सा साहित्य: चिकनच्या फोडी (अर्धा किलो), २ कैऱ्या, २ लसूण पाकळ्या, ३ हिरव्या मिरच्या, २ चमचे दही, थोडसं आलं, मीठ चवीनुसार, १ चमचा लाल मिरची पावडर, अर्धा चमचा जिरं पूड, अर्धा चमचा मेथी पावडर रस्स्यासाठी साहित्य: २ टॉमेटो, २ कांदे, दीड चमचा ऑल स्पाईस पावडर, १ चमचा धणे पावडर, १ चमचा लाल मिरची पावडर, मीठ चवीनुसार, तेल कृती: सर्वप्रथम कैरीची सालं काढून त्याचे छोटे छोटे तुकडे करा. हे तुकडे आणि त्याला लावायला लागणारा मसाला एकत्र मिक्सरमध्ये वाटा. आता हे मिश्रण हाताने चिकनवर पसरावा आणि चिकनमध्ये मुरण्यासाठी १५ ते २० मिनिटं बाजूला ठेऊन द्या. आता एक टॉमेटो आणि एक कांदा यांची पेस्ट बनवून घ्या आणि एका भांड्यात तेल गरम करून ही पेस्ट त्यात टाका. या पेस्टचा रंग बदलताच त्यात ऑल स्पाईस पावडर, धणा पावडर आणि लाल मिरची पावडर घालून चांगलं ढवळा. उरलेला १ टॉमेटो आणि एक कांदा बारीक चिरून त्यात टाकून त्याला ५-७ मिनिटं शिजू द्या. आता यात चिकन घाला. आता यात पाणी घालून चिकन चांगलं शिजू द्या. अधूनमधून चिकन ढवळत राहा.

आंबा फिरणी साहित्य: १ लीटर फुल क्रीम दूध, ३ चमचे तांदूळ, पाऊण कप साखर, १ कप आमरस, सजावटीकरता ड्राय फ्रूट्स कृती: तांदूळ स्वच्छ धुवून, जवळपास १ तास भिजवत ठेवा. नंतर त्यातलं पाणी काढून तांदूळ मिक्सरमध्ये वाटून घ्या. गरज असल्यास अगदी थोडसं पाणी घाला. एक भांड मंद आचेवर ठेऊन त्यात दूध घाला आणि ते दुध चांगलं उकळू द्या. आता त्या दुधात तांदळाची पावडर घाला. हे मिश्रण चांगलंच शिजू द्या. जेव्हा दूध अर्ध्यावर येईल तेव्हा तुम्हाला घट्ट फिरणी मिळेल. एवढ लक्षात ठेवा हे मिश्रण थंड झाल्यावर अजून जाड होतं. आता त्यात साखर घाला. अर्धा तास हे मिश्रण थंड होऊ द्या. आता त्यात आंब्याचा रस घाला आणि तुम्ही या फिरणीचा अस्वाद घेऊ शकता.