चविष्ट..कुरकुरीत

बाहेर धो-धो कोसळणारा पाऊस....अंगाला झोंबणारा वारा, अशा वेळी हातात वाफाळता चहा आणि चविष्ट भजीची प्लेट...स्वर्गसुखच जणू! कांदा-बटाट्याची भजी तर आपण दर पावसाळ्यात बनवतो. यंदा कुछ हटके हो जाए! म्हणूनच मटाने तुमच्यासाठी आणल्या आहेत खास मान्सून स्पेशल भजी रेसिपीज

बेबी कॉर्न भजी
साहित्य - १०-१२ बेबी कॉर्न, १ वाटी बेसन, १ चमचा तांदळाचे पीठ, १ चमचा कॉर्नफ्लोर, ३-४ लसूण पाकळ्या, २ बारीक चिरलेल्या मिरच्या, १ लहान तुकडा आलं, २ चमचे बारीक चिरलेली कोथिंबीर, मीठ, १/२ चमचा चाट मसाला, १/२ वाटी पातीचा कांदा, चिमूटभर बेकिंग सोडा, ३ चमचे तेल.

कृती- सर्वप्रथम बेबी कॉर्न स्वच्छ धुवून घ्या. मिक्सरमध्ये आलं-लसूण- मिरची पेस्ट बनवून घ्या. एका मोठ्या बाऊलमध्ये बेसन, कॉर्नफ्लोअर, तांदळाचे पीठ व वरील पेस्ट घेऊन एकजीव करा. आवश्यकतेनुसार थोडे-थोडे पाणी घाला व ढवळून हलके करून घ्या. गरम तेल, कोथिंबीर, मीठ व सोडा घालून मिश्रण पुन्हा ढवळून घ्या. कढईमध्ये तेल गरम करून मध्यम आचेवर बेबी कॉर्न्स या मिश्रणात घोळवून तळून घ्या व पुदिना चटणी सोबत सर्व्ह करा.

व्हेजी पकोडा
साहित्य- २ वाट्या बेसन, ४ चमचे तेल, २ चमचे जिरे, १ बारीक चिरलेली ढोबळी मिरची, १/२ वाटी पाणी, १ मध्यम आकाराचा बटाटा, १ वाटी फ्लॉवरचे तुकडे, १/२ वाटी चिरलेला कोबी, ४-५ पालकाची पाने, १-१/२ वाटी चिरलेला कांदा, चवीनुसार मीठ.

कृती- प्रथम बटाटा उकडून घ्या. सर्व भाज्या बारीक चिरून घ्या. एक बाऊलमध्ये बेसन, मीठ, तेल, जिरे व पाणी एकत्र करून मिश्रण एकजीव करून घ्या व अर्धा तास बाजूला ठेवा. नंतर त्यामध्ये भाज्या घालून नीट ढवळून घ्या व मध्यम आचेवर तेलात तळून घ्या. गरमागरम व्हेजी पकोडा टोमॅटो सॉस सोबत सर्व्ह करा.