थोडं गोड, थोडं झणझणीत

ओल्या नारळाची करंजी, तिखट शेव आणि चिवडा म्हटलं की तोंडाला पाणी सुटतं. पण हे सगळं खाऊन कंटाळा आला असेल तर काही पारंपरिक पदार्थांना मॉडर्न टच दिलेले पदार्थ तुम्हाला खायला नक्कीच आवडेल. दिवाळीची लज्जत वाढवण्यासाठी काही प्रसिद्ध शेफ्सनी मटाच्या वाचकांसाठी पाककृती शेअर केल्या आहेत.

चकलीचं टार्ट

साहित्य- ६० ग्रॅम मैदा, ४० ग्रॅम तांदळाचं पीठ, २० ग्रॅम बेसन, पाव चमचा हळद, अर्धा चमचा ओवा, अर्धा चमचा जिरे, अर्धा चमचा लाल मिरची पावडर, पाव चमचा हिंग, एक चमचा तीळ, सात ते दहा ग्रॅम मीठ चवीनुसार, ६० ग्रॅम बटर (सॉल्टलेस असल्यास प्राधान्य), थोडं बर्फाळ पाणी, घरातील लोणी, कांदा बारीक चिरलेला, एक चमचा लिंबाचं लोणचं (फोड आणि खार हे दोन्हीही आवश्यक), बारीक चिरलेली कोंथिबीर

कृती- प्रथम बेसन भाजून घ्या. नंतर ओवा, जिरे हे भाजून चुरुन घ्या. नंतर मैदा, बेसन, तांदळाचं पीठ या बरोबर चुरुन घेतलेला ओवा, जिरे आणि लाल तिखट, हिंग हे चाळून घ्यावं. नंतर त्यात बटर घाला (थंडच हवं). हे मिश्रण मिक्स करुन त्याचे क्रम्स स्वरुपात करुन घ्या. नंतर त्यात बर्फाळ पाणी घाला. हे मिश्रण प्लास्टीकमध्ये व्रॅप करायचं आणि २० मिनिटं फ्रिजमध्ये ठेवावं. त्यानंतर ते बाहेर काढून साधारण १ मिमीची जाड पोळी लाटून घ्या. त्या पोळ्या टार्ट मोल्डस असतील त्याचा वापर करावा आणि नसल्यास तुम्हाला हवा तो आकार तुम्ही देऊ शकता. टार्ट मोल्डमध्ये बटरचं ग्रीजिंग करुन मैद्याचं डस्टिंग करुन घ्यावं. लाटलेली पोळी मोल्डला लावून चिकटवून घ्यावी. त्याला काट्या चमच्याने भोकं पाडून घ्यावी. पोळीच्या मध्यभागी काबूली चणा वगैरे वजनासाठी ठेवू शकता. हे १६० डीग्रीला १५ ते २० मिनिटं भाजून घ्यावं. नंतर ते मोल्डमधून काढून घेऊन थंड करायला ठेवावं. त्यांनतर त्याच्या मध्यमागी लोणी, कांदा, लिंबाचं लोणचं आणि त्यावर सजावटीसाठी कोंथिबीर घालावी.

- शेफ प्रसाद कुलकर्णी

तंदूरी गुजिया

साहित्य
पातीसाठी- एका वाटी मैदा, एक चमचा कॉर्नफ्लॉवर, एक चमचा तांदळाचं पीठ, चिमूटभर सोडा, अर्धा छोटा चमचा ओवा आणि चवीप्रमाणे मीठ

स्टफिंगसाठी- पनीर, सिमला मिरची, कांदा, दही, लाल मिरची पावडर, लिंबू, आले लसूण पेस्ट, थोडी धणे-जिरे पूड, कोळसा (तंदूर करण्यासाठी) आणि तूप

कृती- पनीर व सगळ्या भाज्या बारीक चिरुन घ्याव्यात. कढईमध्ये तेल घेऊन फोडणी करावी. त्यात आले-लसूण पेस्ट व कोळसा तूप वगळून वरील सर्व साहित्याची फोडणी करावी. दही शेवटी घालावं. नंतर कोळश्याचा तुकडा गॅसवर लाल होईपर्यंत गरम करावा. कढईमध्ये छोटी वाटी ठेऊन त्यात लाल झालेला कोळसा ठेऊन त्यावर गरम तूप सोडून लगेच झाकण बंद करावं. आता तयार पिठाची गोल पाटी लाटून घ्या. करंजीमध्ये सारण भरतो त्याप्रमाणे पातीमध्ये भरून घ्या. कडा बंद करुन घ्या आणि गरम तेलात कुरकुरीत होईपर्यंत तळून घ्या. हिरव्या चटणीबरोबर हे सर्व्ह करावं.

- शेफ अद्विती धात्रक

चोको-काजू मांडे

साहित्य- ५०० ग्रॅम मैदा, ५०० ग्रॅम साखर, १०० ग्रॅम किसलेलं चॉकोलेट, २०० ग्रॅम काजू, ५० ग्रॅम भाजलेले तीळ, चिमूटभर मीठ, तळण्यासाठी तेल

कृती- प्रथम मैद्यामध्ये चिमूटभर मीठ व पाणी घालून पीठ घट्ट मळून घ्या आणि दहा मिनिटं झाकून ठेवा. त्यानंतर साखर व काजू एकत्र मिक्सरमधून पीठी करून घ्या व त्यात भाजलेले तीळ, किसलेलं चॉकोलेट मिक्स करून बाजूला ठेवा. दुसरीकडे कढईत तेल गरम करायला ठेवा व मैद्याच्या पिठाच्या पुरी एवढे गोळे करून पातळ पारदर्शी पुऱ्या लाटून घ्या. त्या सगळ्याच लाटून पसरवून ठेवल्या तरी चालतील. एक स्टीलची चाळण कढई समोरच ठेवा व आपलं तयार सारण चाळणीच्या बाजूलाच ठेवून घ्या. आता लाटलेली पुरी एक-एक करून तेलात सोडा. दोन्ही बाजूनी पांढरी पापडा सारखी झाली की दोन झाऱ्याच्या मदतीने भाजा. त्याला फुगे येणार नाही याची काळजी घ्यावी. म्हणून ती खूप पातळ लाटावी. लगेच ती पुरी चाळणीत ठेवा व वरून चमच्याने सारण पेरा आणि ती पुरी त्रिकोणी दुमडा. अशाप्रकारे आपले चोको-काजू मांडे तयार.

- शेफ प्राजक्ता शहापूरकर

पूडाची वडी

साहित्य - पारीसाठी- दोन कप मैदा, अर्धा कप बेसन, एक टीस्पून तिखट, एक टीस्पून जाडसर वाटलेले जिरे, एक टीस्पून ओवा, मीठ चवीनुसार, चार टीस्पून तेलाचं कडकडीत मोहन

सारणासाठी- दोन वाट्या सुक्या खोबऱ्याचा कीस, एक वाटी बारीक चिरलेली कोंथिबीर, दोन टीस्पून ठेचलेला लसूण, दोन टीस्पून गरम मसाला, मीठ चवीनुसार, अर्धा टीस्पून वेलची पावडर, चार टीस्पून लाल तिखट, एक टेबलस्पून भाजलेली खसखस, एक टेबलस्पून भाजलेले तीळ

कृती- पारीचे सर्व साहित्य एकत्र करुन पीठ मळून घ्या. सारणासाठी सुक्या खोबऱ्याचा कीस हलकाच भाजून घ्या. त्यात कोथिंबीर व इतर सर्व साहित्य एकत्र करुन छान एकजीव करा. पिठाचा गोळा घेऊन उभा लाटून त्यावर सारण पसरवा. त्याच्या कडा दुमडून घडी घाला. थोडं दाबून तिरक्या आकारात वड्या कापा. नंतर त्या तेलात तळून घ्या.

- शेफ मंजिरी कपडेकर