बिनतेलाचे हेल्दी दुधी थेपले

दुधी या फळभाजीत प्रोटीन, कॅल्शिअम आणि फायबर यांचे योग्य प्रमाण असते. थेपले ही पारंपरिक गुजराती स्नॅक्स डिश दुधी घालून आपण हेल्दी बनवू शकतो. ती कशी, तर मुळात थेपल्यांसाठी बरेच तेल लागते. मात्र दुधीच्या थेपल्यांसाठी तेवढे तेल न वापरता ते चांगल्या प्रकारे शेकले जाऊ शकतात. फ्रीजमध्ये न ठेवताही हे दुधी थेपले दोन दिवस चांगले राहत असल्याने प्रवासाला जाताना तर ते एकदम उत्तम. तर मग पाहा दुधी थेपल्यांची ही हेल्दी रेसिपी...

साहित्य:
(या प्रमाणात साधारण १५ थेपले होऊ शकतात)
२ कप किंवा पाव किलो गव्हाचे पीठ, पाऊण कप दुधी, १ चमचा दही, अर्धा चमचा हळद, ४-५ हिरव्या मिरच्या बारीक चिरलेल्या, ४-५ लसूण पाकळ्या ठेचलेल्या, १ चमचा तेल, चवीनुसार मीठ, चिमूटभर साखर( पर्यायी)

कृती:
१. दुधी चांगला किसून घ्या.
२. त्यातील अतिरिक्त पाणी गाळून बाजूला काढा.
३. आता किसलेल्या दुधीत गव्हाचे पीठ, दही, हळद, हिरव्या मिरच्या, लसूण, तेल, मीठ आणि हवी असल्यास साखर घालून चांगले मळून घ्या.
४. त्या मळलेल्या पीठाचे १५ समान गोळे करून घ्या.
५. गोलाकार लाटून नॉन-स्टीक तव्यावर मंद आचेवर हे थेपले तेल न लावताच शेकून घ्या.
६. प्रवासात नेताना हिरवी पुदीना चटणी, दही किंवा बटाट्याच्या भाजी सोबत ते खाता येतील.
७. मात्र गरमगरम थेपले मसाला चहासोबत खूपच छान लागतात.
८. नक्की ट्राय करून पाहा.