सोया चंक्सचे खुसखुशीत वडे

सोया चंक हे शरीरासाठी पोषक आहेत. मात्र अनेकांना सोयाची भाजी आवडत नाही. अशावेळी सोया चंक्सना ट्वीस्ट देत बनवा सोया चंक्स वडे... पाहा ही रेसिपी

साहित्य :
गरम पाण्यात भिजवून घेतलेले सोया चंक्स-२ वाट्या, १ वाटी उकडून स्मॅश केलेला बटाटा, १ चमचा आलं-लसूण- मिरची पेस्ट, १ बारीक चिरलेला कांदा, दीड वाटी बेसन, हळद, लाल तिखट, जिरे, कढीपत्त्याची पाने, बारीक चिरलेली कोथिंबीर, चवीनुसार मीठ, तेल

कृती :
१. प्रथम एका पॅनमध्ये तेल गरम करून घेऊन त्यात कढीपत्ता, चिरलेला कांदा घालून परतून घ्या.
२. वरून मीठ घालून मग भिजवलेले सोयाचंक्स त्यात घाला.
३. सोयाचंक्स चांगले परतून घ्या व त्यामध्ये आलं-लसूण हिरवी मिरची पेस्ट घाला
४. हळद, आवश्यकतेनुसार लाल तिखट घाला.
५. हे सर्व मिश्रण तयार झाल्यानंतर त्यात उकडलेल्या बटाटा घालून एकत्रित करुन घ्या
६. तयार सोया मिश्रणाचा छोटे छोटे गोळे करून घ्या.
७. एकीकडे गॅसवर एका कढईमध्ये वडे तळण्यासाठी तेल गरम करायला ठेवा.
८. दुसरीकडे एका बोलमध्ये बेसन, मीठ, बेकिंग पावडर, पाणी, लाल तिखट, आलं-लसणाची पेस्ट एकत्र करून त्यात योग्य प्रमाणात पाणी घाला.
९. बटाटे वड्यासाठी जसे पीठ तयार करतो तसे हे पीठ असायला हवे.
१०.आता सोया मसाल्याचे तयार गोळे बोलमधल्या मिश्रणामध्ये घोळवून गरम तेलामध्ये सोनेरी रंगात तळून घ्या.
११. गरमागरम सोया वडे पुदीना चटणी किंवा सॉससोबत सर्व्ह करा.