मोसमी फळांचा कोहिनूर मुरंबा

सीझननुसार आंबा, कैरी, आवळ्याचा मुरंबा बनवून वर्षभर साठवून चवीने खाल्ला जातो. लहान मुलांसाठी तर हे मुरंबे म्हणजे गुपचूप हातावर घेऊन खाण्यासारखं आवडतं चाटण. मुरंब्याचा आणखी एक पर्याय म्हणून छोट्यांना आवडेल असा फळांचा कोहिनूर मुरंबा... पाहा ही रेसिपी.


साहित्य
२० लिंबु, १ किलो साखर, अर्धा चमचा गुलाबपाणी, २०० ग्रॅम साखरेत शिजवलेला अर्धा अननस, १ चिकू, १ सफरचंद, २ पिकलेले नाशपाती, ५० ग्रॅम चेरी, एका डाळिंबाचे दाणे, ४ केळी, आंबा, १ आलुबुखार, २० बदाम, ५ अक्रोड, ५० ग्रॅम द्राक्षं, मगज

कृती
१. एका भांड्यात एक ग्लास पाणी उकळून घ्या
२. पाणी उकळायला लागले की त्यात साखर घालून ढवळा आणि १० मिनिटे मंद आचेवर साखर नीट वितळेपर्यंत ठेवा.
३. या साखर पाण्यात एका लिंबाचा रस घालून ढवळा.
४. वर आलेला फेस काढून मिश्रण गॅसवरून खाली उतरून घ्या.
५. मिश्रण थंड झाल्यावर त्यात गुलाबपाणी मिसळा.
६. वरून सर्व लिंबाचा रस, साखरेत शिजवलेले अननस, बारीक चिरलेली इतर सर्व फळे, डाळिंबाचे दाणे त्यात मिसळा.
७. सुका मेवा आणि गुलाब पाणी घालून बरणी बंद करून ठेवावी.
८. जास्त प्रमाणात बनवून वर्षभर साठवून ठेवायचे असल्यास त्यात पोटॅशियम मेटा बायसल्फाइट अर्धा चमचा मिसळावे.

(टीप: ज्या मोसमात हा मुरंबा कराल त्या मोसमातील ताजी फळेच घ्या.)