साहित्य : १०० ग्रॅम भोपळी मिर्ची, २ मोठे बटाटे, २ मोठे टोमॅटो, २ कांदे, १० ग्रॅम शेंगदाण्याचा कूट, १० ग्रॅम किसलेलं खोबरं, एक पळी तेल, ८ ते १० लसणाच्या पाकळ्या, छोटा अर्धा चमचा जिरं, छोटा अर्धा चमचा राई, कढीपत्ता, अर्धा छोटा चमचा हळद, एक चमचा लाल तिखट, मीठ स्वादानुसार.
कृती : प्रथम भोपळी मिर्ची, बटाटे आणि टोमॅटो स्वच्छ पाण्याने धुऊन घ्या. नंतर बटाटे सोलून त्याचे बारीक तुकडे करा. त्याचप्रमाणे भोपळी मिर्ची आणि टोमॅटोही बारीक चिरुन घ्या. मग गॅसवर पातेलं ठेवा, त्यात एक पळी तेल टाका. तेल गरम झाल्यानंतर त्यात बारीक चिरलेले दोन मोठे कांदे टाकून चमच्याने व्यवस्थित परतून घ्या. नंतर ८ ते १० लसूण पाकळ्या ठेचलेल्या, जिरं-राई आणि कढीपत्ता टाकून फोडणी द्यावी. फोडणीचं मिश्रण व्यवस्थित परतून घ्या. फोडणी दिल्यानंतर त्यात चिरलेल्या भोपळी मिर्ची, बटाटा आणि टोमॅटोचे बारीक तुकडे टाकून, सगळं मिश्रण एकजीव करून घ्या. मग त्यात लाल तिखट, हळद, शेंगदाण्याचा कूट, किसलेलं खोबरं आणि स्वादानुसार मीठ घालून मिश्रण पुन्हा एकदा एकजीव करून घ्यावं. नंतर पातेल्यावर झाकण ठेवून मंद आचेवर सुमारे १० मिनिटं भाजी शिजू द्या. दहा मिनिटांनी गॅस बंद करा. गरमा गरम शिमला मिर्ची बटाटा टोमॅटोची मसालेदार नि चमचमीत मिक्स भाजी तयार. तुमच्या आवडीनुसार चपाती किंवा तंदुरी रोटीसोबत या भाजीचा आस्वाद घ्यावा. तंदुरी रोटीसोबत या मिक्स भाजीची मजा काही वेगळीच असते!
- भीमाबाई विश्वासराव,शिवडी