डोसा क्रिस्पी कसा बनवाल?

सर्वसाधारण डोश्याची रेसिपी प्रत्येक गृहिणीला माहिती असेलच, यात शंका नाही. पण प्रत्येकीचाच डोसा क्रिस्पी होतो का? खरंतर क्रिस्पी डोसा बनवण्यासाठी देखील पाककौशल्य लागतं. तांदूळ आणि उडिद डाळीचं योग्य प्रमाण यासाठी महत्त्वाचं आहे. मग हे योग्य प्रमाण नेमकं किती आणि कसं, त्यासाठीच पाहा ही डोश्याची 'क्रिस्पी' रेसिपी, खास तुमच्यासाठी...

डोश्याचे पीठ ठराविक तास आंबविलेले गेले तरच तुम्हाला हवा तसा पातळ डोसा मिळू शकतो. त्यासाठी कोणतेही रॉकेट सायन्स नाही. डोश्याचे पीठ चांगले एकजीव होऊन ते पातळसर आणि एकसमान तव्यावर पसरवले गेले पाहिजे.


साहित्य:
अर्धा कप उडिद डाळ, अर्धा कप वाफवलेला भात किंवा साधा तांदूळ, चवीनुसार मीठ

कृती:
डोश्याचे पीठ बनविण्यासाठी-
१. उडिद डाळ आणि तांदूळ /(शिजवलेला भात)साधारण दोन तास भिजवून ठेवा.
२. मग त्यात योग्य प्रमाणात पाणी घालून त्याची पेस्ट होईपर्यंत मिक्सरमध्ये वाटून घ्या.
३. वाटलेल्या मिश्रणात चिमूटभर मीठ घालून एकत्र मिसळून घ्या.
४. मिश्रण एकदम पातळ होणार नाही याची काळजी घ्या.
५. मिश्रण ६-७ तास आंबविण्यासाठी ठेवून द्या.
६. पीठ आंबून चांगले वर आले की त्याला आंबलेल्याचा विशिष्ट वासही येईल.
७. डोश्यासाठी पीठ तयार आहे, असे समजा.

क्रिस्पी डोसा बनविण्यासाठी-
१. मंद आचेवर नॉन-स्टिक तवा चांगला १० मिनिटे गरम होऊ द्या.
२. तवा चांगला गरम झाला की त्यावर १ चमचा तेल घाला.
३. कांद्याच्या चकतीने तेल तव्यावर नीट पसरवून घ्या.
४. त्यामुळे तव्याचा नॉन-स्टिकपणा आणखी वाढेल.
५. नंतर तव्यावरील अधिकची उष्णता शोषून घेण्यासाठी किंचित पाणी शिंपडा.
६. खोलगट चमचा किंवा वाटीने तव्यावर डोश्याचे पीठ घालून ते गोलाकार आणि एकसमान पसरवा.
७. पीठ पसरवताना मध्यभागाकडून सुरूवात करत बाहेरच्या दिशेला गोल फिरवा.
८. थोडेसे तेल डोश्याच्या कडेकडून पसरवा.
९. मंद आचेवरच डोश्याला शिजू द्या.
१०. कडांना हलका सोनेरी रंग दिसला की पातळ लाकडी चमचा डोश्याच्या कडांकडे हलकेच फिरवून घ्या.
११. साधा डोसा हवा असल्याल तसाच तो रोल करा.
१२. मसाला डोसा हवा असल्यास त्यात भाजी भरून तो रोल करून चटणी, सांबर सोबत सर्व्ह करा.
१३. डोश्याचा क्रिस्पीनेस वाढविण्यासाठी दुसरा एक सोपा उपाय म्हणजे, एका वाटीत थोडे पाणी, तेल आणि मीठ घ्या.
१४. हे मिश्रण गरम तव्यावर पसरवा आणि वरीलप्रमाणेच डोश्याचे बॅटर पसरवा.