तवा नान विथ पीज कोफ्ता

हिवाळ्यात गरमगरम खाण्याची मजा काही औरच! मग मेन्यू साधा असला तरी चवीने खाल्लं जातं. थंडीच्या दिवसात मटारही खूप येतात. मटार अर्थात पीज कोफ्त्याची ही साधी तरीही चटपटीत रेसिपी तवा नान सोबत नक्की ट्राय करा.

पीज कोफ्ता

साहित्य :
१ कप हिरवे मटार, २ मोठे बटाटा, १ चमचा बेसन, प्रत्येकी २ चमचे आले-लसूण पेस्ट, ३-४ हिरव्या मिरच्या, जिरे, हळद, धने पावडर, लाल तिखट, २०० ग्रॅम टोमॅटो, तळण्यासाठी तेल, चवीनुसार मीठ



कृती :
१. सर्व प्रथम बटाटे उकडून घ्या. थंड झाले की त्यांची साल काढून घ्या
२. हिरवे मटार चांगले धुऊन घ्या आणि बटाट्या सोबत थोडे जाडसर मिक्सरमधून काढून घ्या.
३. बटाटा-मटारचे हे जाडसर मिश्रण एका भांड्यात घेऊन त्यात बारीक चिरलेली हिरवी मिरची, आले-लसूण पेस्ट आणि बेसन घालून चांगले एकजीव करून घ्या.
४. नंतर त्याचे छोटे छोटे गोळे करून तळून घ्या.
५. हलक्या सोनेरी रंगात हे कोफ्ते तळून घ्या.
६. ग्रेव्हीसाठी आता टोमॅटो, हिरवी मिरची मिक्सरमध्ये फिरवून प्युरी तयार करून घ्या.
७. नंतर एका पॅनमध्ये थोडे तेल घेऊन त्यात जिरे, हळद, धने पूड घालून मंद आचेवर परतून घ्या.
८. वरून टोमॅटो प्युरी घालून तेल सुटेपर्यंत परतून घ्या.
९. चवीनुसार त्यात मीठ, लाल तिखट आणि आवश्यकतेनुसार थोडे पाणी घालून मिश्रणाला चांगली उकळी येऊ द्या.
१०. मिश्रण उकळले की गॅस बंद करून वरून तळलेले कोफ्ते घालून थोडा वेळ झाकून ठेवा.
११. गरमगरम पीज कोफ्त्यावर कोथिंबीर पेरून तवा नान सोबत सर्व्ह करा.
१२. पाहा तवा नानची पुढील रेसिपी...


तवा नान

साहित्य :
३०० ग्रॅम मैदा, अर्धा चमचा बेकिंग सोडा, १ चमचा तेल, पाव कप दही, १ चमचा साखर, चवीनुसार मीठ



कृती :
१. एका भांड्यात मैदा, साखर आणि बेकिंग सोडा एकत्र करून घ्या .
२. आता त्यात दही टाकून चांगले एकजीव करून घ्या.
३. नंतर हळूहळू कोमट पाणी घालत चांगले मळून घ्या.
४. थोडे तेल घेऊन मैदा चांगला गुळगुळीत होईपर्यंत मळा
५. साधारण २ तासांसाठी हे पीठ झाकून ठेवा.
६. पीठ जितके चांगले मुरेल तितकेच चांगले नान तयार होतील.
७. एका बाजूला तवा गरम करायला ठेवा आणि दुसऱ्या बाजूला मळलेल्या गोळ्याची पोळी लाटून घ्या.
८. लाटलेल्या पोळीच्या वरच्या बाजूस पाण्याचा हात फिरवून घ्या.
९. आणि तीच बाजू तव्यावर जाईल अशा पद्धतीने तव्यावर टाका.
१०. तव्याकडची बाजू चांगली शेकली गेली की, तसाच तवा गॅसवर उलटा करून चारही बाजूंनी तवा हलवत तपकिरी रंगात दुसरी बाजूही चांगली शेकून घ्या.
११. नंतर तवा सरळ करून नानला वरून तूप किंवा बटर लावून पीज कोफ्त्यासोबत सर्व्ह करा.