गेल्या काही वर्षांमध्ये कमालीच्या बदललेल्या मराठी सिनेमामध्ये वेगवेगळे विषय येत आहेत. ‘फुगे’ असाच काहीसा वेगळा विषय घेऊन येतो. हिंदीत नव्या ‘दोस्ताना’मध्ये आलेला विषय काहीसा बदलून आणि त्याला मराठमोळा टच देऊन दिग्दर्शक स्वप्ना वाघमारे-जोशी यांनी मराठीत मांडला आहे. दोन जिगरी दोस्त, त्यांच्यातील नाते केवळ मैत्रीचे नसून ते ‘गे’ असल्याचा झालेला दोघांच्या कुटुंबीयांचा गैरसमज, या मुद्द्यावरून त्यापैकी एकाचे मोडलेले लग्न आणि त्यानंतर आम्ही ‘त्यातले’ नाही हे सिद्ध करण्यासाठी चाललेली धडपड असे ‘फुगे’चे कथासूत्र सांगता येईल. चित्रपटाचा विषय वेगळा आहे आणि त्याची मांडणीही हलकी-फुलकी आहे. मात्र, आशयाशी अनुरूप चित्रपटाची मांडणी करताना ओढूनताणून विनोदनिर्मिती करण्यात आली आहे. काही ठिकाणी उत्तम विनोदनिर्मिती होतेही; पण चित्रपटाचा एकूण प्रभाव फारसा पडत नाही. मर्यादित मनोरंजन करणारा चित्रपट म्हणून ‘फुगे’ पाहता येईल.
फुगे
Maharashtra Times 11 Feb 2017, 12:44 am