भर पावसात टिवटिवाट जोरात

मुंबईत पावसाचं तांडव सुरू झालं आणि सोशल मीडियावर पावसाशी संबंधित मेसेज पडू लागले. सेलिब्रिटींकडून ट्विटरवर मेसेजचा पाऊस पडला. बिग बींनी मुंबईकरांना स्वतःची काळजी घेण्यास सांगितलं तर ऊर्मिला कोठारेनं, भर पावसातही कर्तव्यावर असलेल्या पोलिसांचं कौतुक केलं…

देव कदाचित मुंबईवर रागावला असावा. त्यामुळेच विजांच्या कडकडाटासह आकाशात एवढी आतषबाजीही होतेय. पुन्हा एकदा मुंबईत पावसाला उधाण आलं असून सर्वांनी स्वतःची काळजी घ्यावी आणि प्रत्येकाने आपल्या घरीच राहावं.
अमिताभ बच्चन, अभिनेता

पश्चिम द्रुतगती मार्गावरील सगळी वाहतूक अगदी योग्य प्रकारे चालू असून मी विमानतळावर सुखरूप पोहोचले. पण, खराब हवामानामुळे सर्व उड्डाणं स्थगित करण्यात आली आहेत.
सयामी खेर, अभिनेत्री

एकीकडे मुंबईला पावसानं झोडपलं आहे. दुसरीकडे मुंबई पोलिसांकडून मिळणाऱ्या सहकार्याबद्दल त्यांना खरंच शाबासकी द्यायला हवी. या परिस्थितीमध्ये एवढ्या जोमानं मुंबई पोलीस काम करत आहेत त्याबद्दल त्यांची प्रशंसा करावी तितकी कमीच आहे.
उर्मिला कोठारे, अभिनेत्री

मुंबईचा पाऊस हा अगदी गर्लफ्रेंडसारखा असतो. येण्याची अपेक्षा कमी असतानाही त्याचं आगमन झालंच.
नक्ष अझीझ, गायक

विजांच्या कडकडाटामुळे पहाटे मी जागी झाले. मिस्टर कुमार यांनी मला एवढ्या सकाळी उठले म्हणून व्यायाम करण्यासाठी विचारणा केली. मुंबईच्या पावसामुळे माझ्यासोबत हे काही अजबच घडलं. त्यावरून एकानं विचारलं की विजांचा कडकडाटच त्याचा सकाळचा अलार्म असता तर?
ट्विंकल खन्ना, अभिनेत्री

एवढे वर्ष मुंबईमध्ये राहत असले तरी प्रथमच मी अशाप्रकारची मेघगर्जना आणि पाऊस बघतेय. मुंबईचा पाऊस खरंच विलक्षण आहे.
सोफी चौधरी, गायिका-अभिनेत्री