मुंबई टाइम्स टीम
प्रसिद्ध अशा युट्यूबर्सची चॅनेल्स हॅक होऊ लागल्यानं युट्यूबर्समध्ये एकच खळबळ उडाली आहे. 'मुंबई टाइम्स'नं याबाबत 'युट्यूब चॅनेल्स हॅक' ही बातमीही प्रसिद्ध केली. युट्यूबनं हॅकिंगची गंभीर दखल घेतली असून, युट्यूबर्सना दिलासा देण्यासाठी प्रयत्न सुरू केले आहेत. त्यातून काही युट्यूबर्सना त्यांची चॅनेल्सचा अॅक्सेस पुन्हा मिळाला आहे. त्यांची चॅनेल्स ते आता पूर्ववत चालवू शकतील. मुळात ही चॅनेल्स हॅक झाली नव्हती, तर काही तांत्रिक बिघाडामुळे दिसत नव्हती असं युट्यूबचं यावरचं म्हणणं आहे.
लाखाहून अधिक सबस्क्राइबर्स असलेल्या युट्यूब चॅनेल्सचं हॅकिंग होण्याचं प्रमाण खूप वाढलं होतं. हॅकिंगमुळे युट्यूबर्सचं मोठ्या प्रमाणावर नुकसान झालं. या माध्यमातून होणारी त्यांची कमाई बंद झाली. त्यामुळे त्यांच्यात नाराजी होती. युट्यूबकडे याबाबत तक्रार करूनही समाधानकारक उत्तर मिळत नाही, असं युट्यूबर्सचं म्हणणं होतं. पण, युट्यूबनं याची गंभीर दखल घेऊन याबाबत कारवाई सुरू केली. त्यानंतर अनेकांना ११ डिसेंबरपासून त्यांची चॅनेल्स पूर्ववत मिळाली आहेत. 'आमची सुरक्षा व्यवस्था चांगली असून ही चॅनेल्स हॅक न होता काही तांत्रिक बिघाडामुळे काही दिवस या यूट्यूबर्स चे चॅनेल यूट्यूब वर दिसत नव्हतं' असं यूट्यूबचं म्हणणं आहे. युट्यूबर्सच्या चॅनेलचा मालकी हक्क काढला गेला. तेव्हा त्यांच्या इमेल आयडीबरोबर जे चॅनेल जोडला गेलं होतं त्या इमेल आयडीवर ते चॅनेल परत आलं आहे. युट्यूबर्सना त्यांच्या चॅनेलचा मालकी हक्कसुद्धा मिळालेला आहे. अनेकांनी ही आनंदाची बातमी इन्स्टाग्रामवर शेअर केली आहे.