गुगलला १७ हजार कोटींचा दंड!

मटा ऑनलाइन वृत्त । ब्रसेल्स

सर्च रिझल्ट्समध्ये फेरफार केल्याप्रकरणी गुगल या सर्च इंजिनला युरोपियन युनियनने दणका दिला असून गुगलला २.४२ अब्ज युरो म्हणजेच सुमारे १७ हजार ४०० कोटी रुपयांचा जबर दंड ठोठावण्यात आला आहे. युरोपियन युनियनच्या एका नियामक आयोगाने ही कारवाई केली आहे. दरम्यान, गुगलविरोधात आणखी दोन प्रकरणं प्रलंबित असून त्या प्रकरणांतही गुगलविरोधात निर्णय जाण्याची दाट शक्यता आता वर्तविली जात आहे.

अल्फाबेट ही गुगलची पॅरेंट कंपनी असून युरोपियन युनियनकडून झालेली दंडात्मक कारवाई हा कंपनीसाठी मोठा हादरा आहे. मुख्य म्हणजे पुढच्या ९० दिवसांत गुगलने आपल्या शॉपिंग सर्विससाठी दिला जात असलेला फेवर बंद केला नाही तर अल्फाबेट कंपनीच्या रोजच्या जागतिक उत्पन्नातून ५ टक्के वेगळा दंड वसूल केला जाईल, असा इशाराही देण्यात आला आहे.

आयोगाने केलेल्या चौकशीत गुगलची चोरी पकडली गेली आहे. गुगलने आपल्या सिस्टीममध्ये तांत्रिक फेरफार केल्याने सर्च रिझल्टमध्ये गुगलच्या शॉपिंग सेवाच प्रामुख्याने दिसतात, असे उघड झाले आहे. गुगलची कृती नियमांचा भंग करणारी आहे. त्यामुळे अन्य कंपन्या तसेच ग्राहकांचीही दिशाभूल झाली आहे, असे स्पर्धा नियामक आयोगाच्या अध्यक्षा मार्गरेथ वेस्टागेयर यांनी नमूद केले.

दरम्यान, सात वर्षांच्या प्रदीर्घ चौकशीनंतर ही कारवाई करण्यात आली आहे. येल्प, ट्रिपअॅडव्हायझर, फाउंडेम, न्यूज कॉर्प आणि फेअरसर्च या कंपन्यांनी गुगलकडून सर्च रिझल्ट्समध्ये फेरफार केला जात असल्याची तक्रार केली होती.