हसवाफसवी

Swapnil.Ghangale@timesgroup.com
Tweet : @swapnilcsgMT

पॅरडी अकाऊंट हा भन्नाट प्रकार सध्या जोरात सुरू आहे. खऱ्याखुऱ्या लोकप्रिय व्यक्तींच्या नावाने सुरू केलेली ही खोटी अकाऊंट्स म्हणजे मनोरंजनाचा डोस ठरत आहेत. कला, क्रीडा, राजकारण अशा सर्वच क्षेत्रातल्या लोकांच्या नावाने सुरू असणाऱ्या अशाच काही पॅरडी ट्विटर अकाऊंट्सविषयी…

सोशल नेटवर्किंगच्या जगात खरं काय, खोटं काय हे ओळखता येणं कठीणच. त्यातही पॅरडी अकाऊंट हा भन्नाट प्रकार सध्या जोरात सुरू आहे. खऱ्याखुऱ्या लोकप्रिय व्यक्तींच्या नावाने सुरू केलेली ही खोटी अकाऊंट्स म्हणजे मनोरंजनाचा डोस ठरत आहेत. कला, क्रीडा, राजकारण अशा सर्वच क्षेत्रातल्या लोकांच्या नावाने सुरू असणाऱ्या अशाच काही पॅरडी ट्विटर अकाऊंट्सविषयी…

सर रविंद्र जडेजा – खरा रविंद्र जडेजा कधी इन तर कधी आऊट ऑफ फॉर्म असतो मात्र हा खोटावाला जडेजा ट्विटरवर कायमच इन फॉर्म असतो. म्हणूनच त्याला ३ लाख ४० हजारच्या वर फॉलोअर्स आहेत.

लोलेंद्र सिंग - धोनी जसा मैदानात उतरल्यावर काहीतरी घडणारच तसंच काहीतरी घडल्यानंतर हा लोलेंद्र उपरोधिक कमेंट करणारच असा जणू नियमच झाला आहे. कमी अॅक्टिव्ह असूनही ३४ हजारांवर फॉलोअर्स या अकाऊंटला आहेत.

डीजे बॉबी देओल - बॉली देओल आज जेवढा लोकप्रिय नसेल तितकं त्याचं हे खोटं अकाऊंट नेटकऱ्यांमध्ये लोकप्रिय आहे. बॉबी देओलचीच मस्करी करणाऱ्या या अकाऊंटला २३ हजारांहून अधिक फॉलोअर्स आहेत.

खाप पंचायत - खाप पंचायतीने अनेक निर्णय तरूणाईला खटकतात. मग याच निर्णयांवरुन त्यांना चिमटे काढण्यासाठी तयार केलेलं हे अकाऊंट. खूप कमी काळात या अकाऊंटला १७ हजारांहून अधिक लोक फॉलो करू लागले आहेत.

गब्बर सिंग – एखाद्या व्यक्तिरेखेच्या नावाने सुरू झालेल्या अकाऊंटपैकी गब्बरचं हे अकाऊंट सर्वाधिक लोकप्रिय आहे. त्याला ४ लाख ६५ हजारांवर फॉलोअर्स आहेत. उपहासात्मक टिप्पणी, योग्य टायमिंग आणि हटके थिंकींगच्या जोरावर त्याची लोकप्रियता वाढतेय.

ट्रेंडूलकर – ट्रेंडिंग टॉपिक्सवर तिरकस कॉमेंट्री करणारं अकाऊंट म्हणून या अकाऊंटकडे पाहिलं जातं. तेंडुलकरचा स्ट्रेट ड्राइव्ह जितका पाहण्यासारखा होता, तसंच या अकाऊंटवरील ट्विटही न चुकवावं असं आहे. १ लाख २१ हजार चाहते या ट्रेंडूलकरला फॉलो करतात.

परेश रावल - बाबु भय्या हँडलने चालणाऱ्या या खोट्या ट्विटर अकाऊंटची परेश रावल यांनीही अनेकदा स्तुती केली आहे. टू द पॉइंट आणि वर्मावर बोट ठेवणारी मजेदार टीका या अकाऊंटवरून केली जाते. त्याला १ लाख ८८ हजारांहून अधिक फॉलोअर्स आहेत.

अभिषेक बच्चन - अवघ्या आठ महिन्यांमध्ये १० हजारांहून अधिक फॉलोअर्स मिळवलेल्या या पॅरडी अकाऊंटला अनेकजण खरा अभिषेक म्हणून टॅग करतात. ज्यावर हा अभिषेक भन्नाट उत्तरं देतो.

विरेंद्र स्वॅग – ‘साक्षी मलिक के गले मे मेडल कितना शोभा दे रहा है’ हे वाक्य अजरामर करणारं हे ट्विटर हँडल खोट्या सेहवागचं आहे. २५ हजारांहून अधिक फॉलोअर्स असणारे हे पॅरडी अकाऊंट तुफान फटकेबाजी करतं, अगदी खऱ्याखुऱ्या वीरुसारखं.

अल्लादिन - ३८ हजारांवर फॉलोअर्स असणारे हे अकाऊंट ताज्या घडामोडींवर टीका-टिप्पणी करण्यासाठी लोकप्रिय आहे.

याशिवाय मार्क झुकेरबर्ग, अशिष नेहरा, केव्हिन पिटर्सन, नसिर जमशेद, इशांत शर्मा, डेव्हिड वॉर्नर, रोहित शर्मा यांच्या नावांनीही पॅरडी अकाऊंट्स असून, त्यांनाही तुफान प्रतिसाद आहे.

संकलन - स्वप्निल घंगाळे (Twitter: @swapnilcsgmt)