फोरजी नेट तळागाळात पोहोचलं अन् मोबाइलवर प्रादेशिक भाषांमधून होणारं शेअरिंग वाढलं. सोशल मीडियावर शेअर होणाऱ्या पोस्टसमध्ये मराठीचं प्रमाण सध्या खूप वाढू लागलं आहे. यंदा ४ लाखांहून अधिक मराठी मेसेज तयार झाले आणि तब्बल २० लाख वेळा शेअर झाले...
नीरज पंडित
सध्याच्या गणेशोत्सवाच्या वातावरणात सोशल मीडियावर बाप्पा ट्रेंडिंग आहे. तुम्ही म्हणाल यात नवल काय? तर यंदा नवल असं आहे, की मराठी मेसेजेसचे प्रमाण खूप वाढलं आहे. एका अहवालानुसार, यंदा सोशल मीडियावर व्हायरल होणाऱ्या कंटेंटमध्ये २५ टक्के वाढ झाली आहे. गणपती बाप्पाचा फोटो आणि त्यावर लिहिलेल्या छानशा ओळी असे मेसेज मोठ्या प्रमाणावर व्हायरल होत आहेत. असे मेसेजेस तयार होण्याचं प्रमाण वाढू लगाल्यामुळे त्याच शेअरिंगही वाढल्याचं दिसून येतंय. शेअरचॅट या अॅपच्या माध्यमातून यंदा सुमारे चार लाखांहून अधिक मराठी मेसेजेस तयार झाले आहेत. व्हॉट्सअॅप, फेसबूक आणि इतर सोशल मीडिया साइट्सवरून २० लाखांहून अधिक वेळा ते शेअर झालेले आहेत.
यात आणखी एक महत्त्वाची बाब दिसून आली ती अशी, की पर्यावरणस्नेही गणेशोत्सवाचा संदेश देणारे मेसेजेस व्हायरल होण्याचं प्रमाणही वाढलं आहे. शेअरचॅटचे व्यवसाय प्रमुख सुनिल कामत यांनी ही माहिती दिली. गणेशासाठी पर्यावरणस्नेही सजावट करण्यापासून ते घरच्या घरीच विसर्जन करा....इथपर्यंतचे संदेश देणारे मेसेजेस यंदा मोठ्या प्रमाणावर व्हायरल झाले आहेत. यात तसे फोटो शेअर करणं, व्हिडिओज शेअर करण्याचं प्रमाण सुमारे २५ टक्क्यांनी वाढलं असल्याचं कामत यांनी सांगितलं.
गणपती बाप्पा चॅलेंज
यंदा वेगवेगळे ट्रेंड्स पाहावयास मिळत होते. यात 'सेल्फी विथ गणपती' यामध्ये आपल्या घरच्या गणपतीसोबत सेल्फी काढून तो शेअर करणं हे सर्वाधिक हिट होतं. त्यानंतर 'गणपती बाप्पा चॅलेंज' सर्वाधिक लोकप्रिय ठरलं. या चॅलेंजमध्ये तरुणांनी गणपती बाप्पाच्या पोजमध्ये फोटो काढून शेअर करायचे होते. गणपती आरती, डेकोरेशन यांचे फोटो शेअर होण्याचं प्रमाणही अधिक होतं.
लाइव्ह दर्शन
यावर्षी एक वेगळा ट्रेंड पाहायला मिळत होता, तो म्हणजे एखादी व्यक्ती सार्वजनिक गणेशोत्सवाच्या ठिकाणी गेली असता तेथील दर्शन, देखावा, आरती याचा व्हिडीओ तयार करून तो शेअर केला जायचा. याचं प्रमाण खूप वाढलं आहे. 'लाइव्ह दर्शन' या नावाखाली हे व्हिडिओज बऱ्यापैकी ट्रेडिंग होत आहेत.
सर्वाधिक मराठी पोस्ट होणारी शहरं
- पुणे
- ठाणे
- मुंबई उपनगर
- नाशिक
- अहमदनगर
...
मराठीतून व्हायरल होणाऱ्या संदेशांचे प्रकार
शुभेच्छा
स्टेटस अँड स्टोरीज
रोमान्स अॅण्ड रिलेशनशिप
..
मराठी मेसेजेस पाठवणारे युजर्स
पुरूष - ७७ टक्के
महिला - २३ टक्के
..
ट्रेडिंग मराठी टॅग्ज
- सुप्रभात
- गणपती
- रिंगटोन्स
- जुनी गाणी