ट्विट बंधनमुक्त; आता वापरा १४० अक्षरं

मटा ऑनलाइन वृत्त । मुंबई

यूजर्ससाठी आनंदाची बातमी आहे. ट्विटर आता पूर्ण १४० अक्षरं असणारी पोस्ट टाकता येणार आहे. कारण आजपासून फोटो आणि जिफ वापरल्यास अक्षरांची संख्या कमी होणार नाही. काही महिन्यांपूर्वी ट्विटरने १४० अक्षरांची मर्यादा काढून टाकण्याची घोषणा केली होती. मात्र, तसं न करता नवीन बदलानुसार त्याच अक्षरसंख्येत अधिक माहिती देण्याची सुविधा उपलब्ध करून दिली आहे. यामुळे आता मीडिया फाइल अपलोड केल्यावर अक्षरांची संख्या कमी होण्याची यूजर्सची तक्रार दूर केली आहे.

मायक्रोब्लॉगिंग जगतातील सर्वात आघाडीवर असणारा डिजिटल प्लॅटफॉर्म म्हणजे ट्विटर. अवघ्या १४० अक्षरांत व्यक्त होणं हे ट्विटरचं वैशिष्ट्य. त्यामुळं मोजक्या शब्दांत बोलण्याचा नेटकऱ्यांना छंदच लागला. परंतु एखादा फोटो किंवा मीडिया फाइल किंवा पोल पोस्ट करताना या १४० अक्षरांवरही मर्यादा आली. २४ ते ३० अक्षरं कमी होऊन फक्त ११०-१२० अक्षरांत त्यांना व्यक्त व्हावं लागत होतं. मात्र आजपासून ‘टिवटिवाट’ करताना फोटो किंवा कोणतीही फाइल अपलोड केल्यानंतर अक्षरांची संख्या कमी होणार नाही. ती १४० पर्यंत राहील. या बदलानंतर ट्विटर आगामी काळात टॅगिंग करताना वापरण्यात येणारी अक्षरं, पोल पोस्ट करतानाही संपूर्ण शब्द मार्यादा वापरण्याची सुविधा देणार आहे.